«ԱՄՆ-ն, ֆրանսիական դաշնակիցները շատ լուրջ հետաքրքրված են տարածաշրջանով»,- «Հայացք» մամուլի ակումբում հրավիրված մամուլի ասուլիսի ժամանակ հայտարարեց Ազգային-ժողովրդավարական բևեռ համահայկական կուսակցության վարչապետի թեկնածու Վահե Գասպարյանը:
Անդրադառնալով ԱՄՆ պետքարտուղարի Եվրոպայի և Եվրասիայի հարցերով օգնականի պաշտոնակատար Ֆիլիպ Ռիքերի՝ Վրաստան այցին և հայտարարություններին՝ նա ասաց. «Գերիները վերադարձվել են հենց ԱՄՆ-ի, Վրաստանի միջնորդությամբ և գերիների վերադարձ եղավ Ֆիլիպ Ռիքերի այցի հաջորդ օրը կամ երկու օր հետո: Ֆիլիպ Ռիքերը խոսեց նրանց մասին ոչ թե որպես ռազմագերիների, այլ ձերբակալված կամ անօրինականորեն պահվող մարդկանց բոլորի մասին խոսեց: Ֆիլիպ Ռիքերը խոսեց հարցի համապարփակ կարգավորման մասին, կարգավիճակը ներառյալ և առաջին հերթին ի հեճուկս Լավրովի, որը ասում է, որ կարգավիճակի հարցն անորոշ ժամանակով հետաձգվում է: Ֆիլիպ Ռիքերը խոսեց նաև Արցախում միջազգային մանդատ ունեցող դիտորդների՝ խաղաղապահների մասին, խոսեց հայ-ամերիկյան հարաբերությունների մասին՝ անվանելով Հայաստանը ընկեր երկիր»:
Վահե Գասպարյանը շեշտեց՝ ԱՄՆ պետքարտուղարի Եվրոպայի և Եվրասիայի հարցերով օգնականի պաշտոնակատար Ֆիլիպ Ռիքերին, այսպես ասած, ուղարկել էին ԱՄՆ նախագահն ու պետքարտուղարը:
Սահմանազատման գործընթացի մասին կարծիք հայտնելուց առաջ Վահե Գասպարյանը պատմական կարճ անդրադարձ կատարեց ու ասաց. «Սահմաններ ասելով՝ նայած ով, ինչ սահմաններ նկատի ունի: Վլադիմիր Պուտինի, Ալիևի և Էրդողանի համար գոյություն ունեն այս սահմանները՝ Խորհրդային Հայաստանի և Ադրբեջանի, որոնք գծվել են Ստալինի կողմից և չեն հանդիսանում միջազգային իրավունքի տեսանկյունից լեգիտիմ սահմաններ: Սրանք ԽՍՀՄ ներքին վարչական սահմաններն են, որոնք փորձում են վերածել պետական սահմանների, ստանալ հայկական իշխանությունների ստորագրությունը: Որոշ ուժեր կան, որոնք ասում են՝ ՀՀ-ն ճանաչել է այս սահմանները ԱՊՀ մտնելու համար: Սա կամ արվում է հարցին խորությամբ չտիրապետելու պատճառով, կամ դիտավորյալ ժողովրդին թյուրիմացության մեջ գցելու համար»:
Կարդացեք նաև
Վահե Գասպարյանի վստահեցմամբ՝ իրենց համար լեգիտիմ սահմաններ են Առաջին Հանրապետության սահմանները: Սահմանազատման մասին էլ ասաց. «Մենք կողմ ենք սահմանների սահմանազատմանը, բաց լեգիտիմ սահմանների»:
Տաթև ՀԱՐՈՒԹՅՈՒՆՅԱՆ
