Ermenihaber. Թուրքիայի նախագահ Ռեջեփ Թայիփ Էրդողանը ՆԱՏՕ-ի գագաթնաժողովին մասնակցելու նպատակով Բրյուսել մեկնելուց առաջ պատասխանել է լրագրողների հարցերին՝ ներկայացնելով, թե ինչ հարցեր է պատրաստվում բարձրացնել ԱՄՆ նախագահ Ջո Բայդենի հետ հանդիպման ընթացքում:
Իր կողմից օրակարգ բերվելիք հարցերի շարքում Էրդողանը հիշատակել է նաև «ապրիլի 24» հարցը՝ նկատի ունենալով այս տարի Բայդենի կողմից ցեղասպանություն եզրույթի կիրառումը:
Էրդողանի խոսքով, իրենք ԱՄՆ-ից նման մոտեցում չէին սպասում, և դա իրենց իսկապես ցավ է պատճառել:
«Թուրքիան պատահական երկիր չէ, ՆԱՏՕ-ում ԱՄՆ-ի դաշնակիցն է: Հայերի հարցում, որոնք ոչ մի առնչություն չունեն ՆԱՏՕ-ի հետ, նման մոտեցումը մեզ վշտացնում է: Ճիշտ չի լինի, եթե հանդիպումն անցնի առանց այս հարցն օրակարգ բերելու և հիշեցնելու»,- ասել է Թուրքիայի նախագահը:
Կարդացեք նաև
Էրդողանի խոսքով՝ հանդիպման օրակարգում կլինեն F-35 արտադրման ծրագրից Թուրքիային դուրս թողնելու հարցը, ռուսական S-400 զենիթահրթիռային ՀՕՊ համակարգերի հարցը, ինչպես նաև Աֆղանստանից ամերիկյան զորքերի դուրս բերումից հետո Քաբուլի օդանավակայանի անվտանգությունն ապահովելու պատասխանատվությունը ստանձնելու թուրքական առաջարկը:
