ԵԽԽՎ՝ Հայաստանի և Ադրբեջանի միջև հակամարտության մարդասիրական հետևանքների հաղթահարման զեկուցող Փոլ Գավանը ողջունել է 15 հայ ձերբակալվածների ազատ արձակումը, ինչպես նաև Աղդամի շրջանում մոտ 100 հազար ականների քարտեզներն Ադրբեջանին հանձնումը:
«Չափազանց կարևոր է միջոցներ ձեռնարկել անցյալ տարի վեցշաբաթյա պատերազմի վերածված այս երկարատև հակամարտության մարդասիրական հետևանքները չեզոքացնելու համար,- ասել է Գավանը: – Չնայած դեռ գերության մեջ պահվող բազմաթիվ հայեր կան ու չնայած Աղդամից բացի այլ ականապատ շրջաններ կան, այսօր մենք կարող ենք ողջունել կողմերին, որոնք տարբեր միջազգային խաղացողների աջակցությամբ և օժանդակությամբ աշխատեցին միասին՝ գտնելու լուծում պատերազմի երկու կարևորագույն մարդասիրական հետևանքների լուծման հարցում»:
Փոլ Գավանը Հայաստան է այցելել 2021թ. մայիսին և նախատեսում է Ադրբեջան այցելել ամռանը: Այցերի արդյունքում էլ կպատրաստվի նրա զեկույցը Հայաստանի և Ադրբեջանի միջև հակամարտության մարդասիրական հետևանքների վերաբերյալ:
Պատրաստեց Վիկտորյա ԱՆԴՐԵԱՍՅԱՆԸ
