«ԿԸՀ-ն հաստատված համարելով Նիկոլ Փաշինյանի՝ ատելության խոսքեր, բռնության կոչեր հնչեցնելու փաստը, չմիջամտեց, այն դեպքում, երբ ի թիվս այլ նորմերի, Անկախ պետությունների համագործակցության մասնակից պետություններում ժողովրդավարական ընտրությունների, ընտրական իրավունքների և ազատությունների չափանիշների մասին կոնվենցիան արգելում է բռնության կոչը և հոգեբանական հարկադրանքը»,- Aravot.am-ի հետ զրույցում ասաց «Զարթոնք» կուսակցության վարչապետի թեկնածու Արա Զոհրաբյանը:
Հիշեցնենք, երեկ ԿԸՀ-ն մերժեց «Զարթոնք» կուսակցության դիմումը`«Քաղաքացիական պայմանագիր» կուսակցության ընտրական ցուցակի գրանցումն ուժը կորցրած ճանաչելու հարցով դատարան դիմելու մասին: «Զարթոնք» ԱՔԿ-ն դիմել էր ԿԸՀ-ին, քանի որ Նիկոլ Փաշինյանի կողմից ատելության, բռնության կոչեր ներկայացնելու պատճառով չի ապահովվում ազատ ընտրությունը:
«ԿԸՀ նիստի ժամանակ, Քաղաքացիական պայմանագիր կուսակցության ներկայացուցիչ Վահագն Հովակիմյանը փորձեց արդարացնել Նիկոլ Փաշինյանի խոսքերը` նշելով, որ եղել է միայն հանցագործներին օրենքով պատժելու խոստում: Ի պատասխան այն հարցի, թե քրեական օրենսգրքի որ հոդվածով է «սաղին բռնելու եմ, շինեմ»-ը համարվում պատիժ, ըստ էության որևէ պատասխան չհնչեց»,- ասաց մեր զրուցակիցը`բացասական գնահատելով ԿԸՀ-ի նման որոշումը:
Նելլի ԳՐԻԳՈՐՅԱՆ
