«Մենք պատրաստվում ենք 2022 թվականից ծնված ամեն 3-րդ եւ հաջորդ երեխային ամիսը վճարել 50 հազար դրամ նպաստ՝ մինչեւ առնվազն 4 տարեկանը: Նպաստը լավ բան չի, պետական տուրք ենք վճարելու ամիսը 50 հազար դրամ»,- այսօր Արարատի մարզի Մասիս քաղաքում նախընտրական քարոզարշավի ժամանակ այսպիսի խոստում տվեց վարչապետի պաշտոնակատար Նիկոլ Փաշինյանը:
Նա ասաց, որ այս ծրագիրը որոշակի ժամկետով է լինելու, հավանաբար մինչեւ 2025 թվականը, որ արդյունքները տեսնեն: Ու եթե 2022-ից մինչեւ 2025-ին ընտանիքը հասցնի 3 երեխա ունենա, երեքն էլ կլինեն շահառու ու 4 տարի պետությունից ամսական կստանան 150 հազար դրամ:
Փաշինյանը հիշեցրեց, որ մինչեւ 2 տարեկան երեխայի դաստիարակության նպաստի համակարգում էական փոփոխություններ են արել: Գյուղական բնակավայրերում աշխատող մայրերի համար նպաստը կրկնապատկել են, դարձրել են 53 հազար դրամ ու նույնիսկ չաշխատող մայրերի համար 26500 դրամ նպաստն ապահովել են:
Հռիփսիմե ՋԵԲԵՋՅԱՆ
