«Կառավարության վերջին նիստում, չզեկուցվող հարցերով, 750 միլիոն դրամ տրամադրվել է կորոնավիրուսի տնտեսական հետեւանքների չեղարկմանը` «Համահայկական ֆոնդի» միջոցով»,- այսօր կայացած մամուլի ասուլիսում ասաց «Պատիվ ունեմ» դաշինքի պատգամավորի թեկնածու, ՀՀԿ երիտասարդական կազմակերպության նախագահ Հայկ Մամիջանյանը:
Հարցին կցված փաստաթղթերով, ըստ Հայկ Մամիջանյանի, որեւէ կերպ չի նկարագրվում, թե ի՞նչ ծրագրի շրջանակներում, ինչպե՞ս եւ տնտեսության ո՞ր ոլորտներում են օգտագործվելու այդ գումարները: Ըստ բանախոսի, դաշինքում հակված են համարել, որ սա կառավարության կողմից պետբյուջեի հաշվին ընտրակաշառքի բաժանման հերթական դրսեւորումն է, ինչպիսիք արդեն եղել են գյուղացիական տնտեսություններին` սուբսիդիաների տեսքով, «Սպայկա» ընկերությանը հատկացված սուբսիդիաների տեսքով:
Հայկ Մամիջանյանն ուշադրություն է հրավիրում այն հանգամանքին, որ կորոնավիրուսի վարակի թվերն ամեն օր անշեղորեն նվազում են, եւ այս պահին դա Հայաստանում թիվ մեկ խնդիրը չէ:
Ամփոփելով քարոզարշավի առաջն շաբաթը, Հայկ Մամիջանյանն ասաց, որ քարոզարշավի ընթացքում «Պատիվ ունեմ» դաշինքի ներկայացուցիչների առաջատար դերակատարումն ընդգծվեց տարբեր ձեւաչափերով բանավեճերի ժամանակ: Ըստ բանախոսի, իրենց կուռ եւ ամուր փաստարկներն են հավանաբար պատճառը, որ մինչ օրս չի հաջողվում ՔՊ ներկայացուցչների հետ բանավեճերի համաձայնություններ ստանալ: Քարոզարշավի ընթացքում դաշինքում հանգել են այն եզրակացության, որ ՀՀ քաղաքացիները կարեւորում են անվտանգային խնդիրները: Ըստ իրենց վերլուծության, նախագահ Սերժ Սարգսյանը տարիներ շարունակ ասոցացվում է անվտանգության եւ անվտանգային համակարգերի, անվտանգ երկրի կայացման եւ պահպանման հետ:
Կարդացեք նաև
Հայկ Մամիջանյանն անդրադարձավ նաեւ ՔՊ-ի քաղաքապետարան դիմումին` ամսի 21-ին Հանրապետության հրապարակում հանրահավաք անելու առիթով. «Վարչապետի պաշտոնը զբաղեցրած անձը ակնարկում է, որ ինքն իր արյունոտ ձեռքերը հեշտ չի տանի իր զբաղեցրած աթոռից: Կապիտուլյանտին խոհեմության կոչ անելն անիմաստ եմ համարում, բայց մեր քաղաքացիներից`անկախ իրենց քաղաքական հայացքներից, ակնկալում եմ, որ չեն գնա մեկ խենթի կոչին եւ իր հրահրած քաղաքական վենդետաներին, ոչ մի դեպքում չեն հետեւի քաղաքական բախումների տանող հռետորաբանությանը: Ես չեմ հավատում, որ կա որեւէ հայ, որը կապիտուլյանտի իշխանության վերարտադրման համար պատրաստ կլինի մեր երկրի համար նման վտանգավոր զարգացումների»:
Նելլի ԳՐԻԳՈՐՅԱՆ
