«Հայաստան» դաշինքի պատգամավորի թեկնածու Արմենուհի Կյուրեղյանն այսօր Վանաձորում կազմակերպված հանրահավաքի ժամանակ ասաց, որ ինքն էլ շատերի պես պատերազմում զոհված հարազատի շիրիմին երդում է տվել, որ մեղավորը պետք է պատասխան տա. «103 տարի առաջ Ղարաքիլիսայի ճակատամարտում մենք կանգնեցրինք մեր թշնամուն, մենք ջախջախեցինք նրան ու դուրս շպրտեցինք մեր երկրից: Մենք այդ ճակատամարտում հաղթեցինք, որովհետեւ ունեինք խոսքի գիտակ, գործի գիտակ, գործի նվիրյալ Գարեգին Նժդեհ: Ես ուզում եմ ձեզ դիմել որպես կին եւ որպես 3 երեխաների մայր: Բոլորս կորցրել ենք՝ հարազատ, զավակ, բարեկամ այս 44 օրյա դավաճանված պատերազմում: Համոզված եմ, ինձ նման շատերը իրենց հարազատի շիրիմին երդում են տվել, որ երկիրն ազատելու են այս դավաճաններից, որ այդ երիտասարդների մահվան թիվ մեկ մեղավորը պետք է պատասխան տա»,- ասաց Կյուրեղյանն ու շարունակեց, որ այդ ամենը եղել է իրենց սխալ ընտրության արդյունքը. «Բայց եկեք ասենք, որ այս միգուցե ամենը կարող էր ավելի մեղմ լինել, կամ չլիներ, եթե 3 տարի առաջ մենք սխալ ընտրություն չանեինք: Այդ սխալը կրկնելու իրավունք մենք այլեւս չունենք»:
Տաթեւիկ ՂԱԶԱՐՅԱՆ
