«Երեկ Նիկոլ Փաշինյանը ստեր էր տարածում, թե Արցախի կարգավիճակի մասին հարց գոյություն չի ունեցել, թե միայն տարածքները հանձնելու խնդիր է եղել։ Անբարոյական ստեր են»,-լրագրողների հետ հանդիպմանն այսօր հայտարարեց «Պատիվ ունեմ» դաշինքի ներկայացուցիչ, ՀՀԿ փոխնախագահ Արմեն Աշոտյանը։
Նա հորդորեց ՌԴ ԱԳՆ կայքում ընթերցել ԵԱՀԿ ՄԽ ռուսաստանցի համանախագահողի հայտարարությունը, որը մոռացության է մատնված տեղեկատվական աղմուկի մեջ․ «Դրանում նշված է, թե ինչպիսին է եղել բանակցային ժառանգությունը։ Գրված է, որ հինգ շրջան հանձնելուց հետո ստացվելու է Արցախի միջանկյալ կարգավիճակը։ Որքա՞ն ապուշ եւ անբարոյական պետք է լինես, որ սեփական ժողովրդիդ դնես հիմարի տեղ եւ խաբես։ Խաբեցիր, որ այդքան երեխայի գլուխ կերար»։
Արմեն Աշոտյանը պնդեց, որ Փաշինյանի իշխանությունն անգամ պատերազմից հետո է խաբել հանրությանը՝ զիջելով ՀՀ-ի եւ Արցախի ազգային շահերը։
Ապա Արմեն Աշոտյանը որպես ապացույց հրապարակեց ապրիլին ստեղծված փաստաթուղթ, որը պետք է ընդունվեր Եվրանեսթի խորհրդարանական վեհաժողովի լիագումար նիստում, բայց չի ընդունվել զուտ այն պատճառով, որ երկրներից մեկն իր իսկ տեսանկյունից բխող վետոյի իրավունք է կիրառել։ Արմեն Աշոտյանի խոսքով՝ փաստաթուղթն իր ձեւաչափով ուղերձ է՝ վերաբերող Եվրամիության եւ Արեւելյան գործընկերության երկրների սպասվող համատեղ գագաթնաժողովին։
Կարդացեք նաև
Արմեն Աշոտյանի փոխանցմամբ՝ Եվրանեսթի բյուրոյի նիստում փաստաթուղթը ներկայացվել է որպես նախագիծ, եւ հայկական պատվիրակությունը չի առարկել․ «Փաստաթղթի կետերից մեկով միջազգային հանրությանը եւ ԵՄ, Արեւելյան գործընկերության ազգային խորհրդարաններին կոչ է արվում դատապարտել գործընթացներն ու հասարակական ուղերձները, որոնք պարունակում են ատելություն, էքստրեմիզմ, եւ, ուշադրություն, ռեւանշիզմ։ Հետկոնֆլիկտային իրավիճակներում ռեւանշիզմի դատապարտման մասին է խոսքը։ Ո՞վ է մեյդան բերել «ռեւանշիզմ» բառը՝ Ադրբեջանն ու Նիկոլը, Ադրբեջանն ու լենանազարյանները։ Այսինքն, սրանով ուզեցել են Եվրոպայում մեր ժողովրդի, քաղաքական ընդդիմության բերանը փակել։ Իսկ մյուս կետում ասվում է, որ Եվրանեսթը վերահաստատում է ԵԱՀԿ-ի կողմից ջանքերի, եւ, ուշադրություն, վստահության քայլեր ձեռնարկելուն օժանդակելը։ Այսինքն, այստեղ ԵԱՀԿ մանդատը վերաձեւակերպելու քաղաքական ուղերձ կա։ Ու այս թղթին համաձայնություն է տվել հայկական պատվիրակությունը։ Այս երկու ռումբերով իբրեւ թե ՀՀ-ին եւ Արցախին են ներկայացրել մեր իշխանությունները Եվրոպայում։ Սա դավաճանություն է։ Նման թղթեր էլի են լինելու, այս մեկը մեր աղբյուրներն են փոխանցել»։
Լուիզա ՍՈՒՔԻԱՍՅԱՆ
