Հայաստանի Մտավորականների Ֆորումի Ավագանու հայտարարությունը
Այսպես ու̔ր ենք գնում
2020թ. նոյեմբերի 9-ի տխրահռչակ եռակողմ հայտարարությունից հետո Հայաստանի Մտավորականների Ֆորումի Ավագանին (ՀՄՖԱ) ահազանգել էր, որ իշխանություն-ընդդիմություն օր-օրի խորացող հակասությունը Հայաստանի Հանրապետության համար վերածվելու է լրջագույն սպառնալիքի, իսկ լեգիտիմ ճանապարհով ձևավորված իշխանությունը դառնում է լեգիտիմությունը կորցրած ապակառուցողական իշխանություն:
Նմանատիպ ֆորսմաժորային իրավիճակներում, երկրում խորացող առճակատումը կանխելու նպատակով, սկսած 2004թ-ից ՀՄՖԱ-ն կազմակերպել է առանձին հանդիպումներ իշխանական և ընդիմադիր կուսակցությունների հետ: ՀՄՖԱ-ն համոզված էր և այժմ էլ գտնում է, որ երկրում ստեղծված իրավիճակի հաղթահարումը հնարավոր է միայն ազգային համերաշխության և միասնականության պայմաններում :
Կարդացեք նաև
Ելնելով վերոնշյալից, ՀՄՖԱ-ն ս.թ. հունվարի 21-ն հանդիպեց «ՔՊ» կուսակցության ղեկավար, երկրի վարչապետ Նիկոլ Փաշինյանի հետ, առաջարկելով ընդունել ճգնաժամից դուրս գալու մեր ճանապարհային քարտեզը, գալ ընդհանուր համաձայնության, ինչի արդյունքում հնարավոր կլիներ արտահերթ ընտրությունների միջոցով դուրս գալ ճգնաժամից և վերականգնել երկրի կյանքի բնականոն ընթացքը: Ցավոք, հանդիպումը ցանկալի արդյունք չտվեց, իսկ հանրության ներքին երկփեղկվածությունը ընդունեց ավելի վտանգավոր և ծայրահեղ ձևեր:
Եվ այժմ, արտահերթ խորհրդարանական ընտրությունների նախաշեմին, երբ երկիրը ենթարկվել է ծանր վայրիվերումների, կորցրել է բնօրրանի զգալի հատվածներ, երբ թշնամին ներխուժել է ՀՀ ինքնիշխան տարածք և երազում է լողալ Սևանի ջրերում, իշխանական և ընդդիմադիր ուժերը զբաղված են իրար վրա փողոցային բառամթերքով ցեխ շպրտելով և բռնության ու հաշվեհարդարի հրապարակային կոչեր անելով: Այսպիսի գործելաոճը էլ ավելի է խորացնում հանրության երկփեղկվածությունը, դրանով իսկ ջուր լցնելով թշնամու ջրաղացին:
ՀՄՖԱ-ն կտրականապես մերժում է նման գործելաոճը և հորդորում է արտահերթ ընտրություններին մասնակցող բոլոր քաղաքական ուժերին հանդես բերել ստեղծված իրավիճակի լրջությանը համարժեք զսպվածություն և ազգային-պետական շահը գերադասել նեղ անձնական նկրտումներից:
Ընտրության իրավունք ունեցող քաղաքացիներին կոչ ենք անում ակտիվորեն մասնակցել ընտրություններին: Անհաղորդ մնալը անթույլատրելի է և հակասում է պետության շահերին:
ՀՄՖ Ավագանու անունից՝
Գառնիկ Մարգարյան,
Հովիկ Վարդումյան,
Լենսեր Աղալովյան,
Արամ Մկրտչյան,
Ազատ Սարգսյան
