Վարչապետի պաշտոնակատար Նիկոլ Փաշինյանի ու նրա գլխավորած ՔՊ կուսակցության նախընտրական քարոզարշավը Լոռու մարզում շարունակվում է:
Որպես հունաբնակ հայտնի Յաղդան համայնքում Նիկոլ Փաշինյանին տեսնելով՝ հավաքված կանայք նախ կշտամբեցին, թե՝ ժամը 12-ից քեզ ենք սպասում: Իսկ Փաշինյանը «ուշացել» էր մոտ 5 ժամ:
Ուշագրավ էր, որ կանանցից մեկը պինդ գրկել էր Փաշինյանին, մյուսը սպասում էր իր հերթին ու երբ հանդիպեց, փորձեց Փաշինյանի աջը համբուրել: Վերջինս ձեռքը հետ քաշեց ու թույլ չտվեց:
Կարդացեք նաև
Յաղդանցիները Փաշինյանին ասացին. «Պարո՛ն Փաշինյան, դու եկար, Հիսուսի տանջանք տարար չարիքի դիմաց, բայց ժողովուրդը ձեզ հետ է ամեն դեպքում: Փաշինյան ջան, դրանց մի հատ ոչնչացրու, իզ ու թոզները չերեւա»:
Փաշինյանին Հիսուսի հետ համեմատողն ասաց. «Էս փոքր խանութի տերը ես եմ, ձեզանից առաջ վերեւից ասում էին՝ մեզանից պահանջում են. տարվա սկզբից կաշառք էին ուզում, տարվա վերջին ուզում էին, վերեւից պահանջում էին: Իսկ հիմա ձեր օրոք՝ ոչ մի բան: Պաժառնին (հակահրդեհային ծառայություն) գալիս էր, սանէպիդկայանը գալիս էր, հարկայինը գալիս էր, թե՝ փող տվեք, փող տվեք, վերեւը պիտի տանք: Այս փոքր խանութով գիտե՞ք ինչքան եմ տվել: Շնորհակալ եմ ձեզ, որ այս 3 տարվա մեջ ոչ մի բան չկա, ուղղակի հուզվում եմ, որ ասեմ՝ ձեր օրոք լավ է»:
Հռիփսիմե ՋԵԲԵՋՅԱՆ
