Կենտրոնական ընտրական հանձնաժողովն այսօր մերժեց ՀԴԿ ցուցակում ընդգրկված, կուսակցության վարչապետի թեկնածու Տիգրան Արզաքանցյանին՝ ընտրական ցուցակում գրանցելու հարցը: Տիգրան Արզաքանցյանը չկարողացավ ապացուցել, որ վերջին 4 տարիներին մշտապես բնակվել է Հայաստանում։ ԿԸՀ-ի հաշվարկներով ՝ նա Հայաստանից բացակայել է փաստաթղթերի ներկայացման օրվան նախորդող 1461 օրից 1005 օրը։
Տիգրան Արզաքանցյանի՝ երկրից բացակայությունները հարգելի են համարվել, քանի որ տեղեկանք է տրամադրել Մոսկվայի Տեղեկատվական տեխնոլոգիական համալսարանում սովորելու մասին, իսկ այդ դեպքում օրենքը չի սահմանափակում թեկնածուի առաջադրումը: Սակայն տեղեկանքում նրա ուսուցման ժամկետները չեն համընկնում, և ներկայացրած 3 տեղեկանքներում ժամկետների հետ կապված անճշտություններ կան. խոսքը մի դեպքում 7 ամսվա տարբերությունների մասին է, մեկ այլ դեպքում՝ ԲՈՒՀ-ի ռեկտորի պատասխանում հաստատվում է Արզաքանցյանի ուսումնական հաստատությունում ուսանելու փաստը, սակայն նշվում է, որ դա եղել է 2011-ի սեպտեմբերից մինչև 2017-ի սեպտեմբերն ընկած ժամանակահատվածը: Դրանից հետո նա հեռացվել է համալսարանից` պայմանագրային պարտավորությունները չկատարելու համար:
ԿԸՀ նախագահի փոխանցմամբ՝ փաստաթղթերում կան նաեւ ակնհայտ կնիքի տարբերություններ։ Տիգրան Արզաքանցյանի ներկայացուցիչը չկարողացավ այդ առիթով ԿԸՀ նախագահի հարցերին պարզաբանումներ ներկայացնել, նա 24 ժամ ժամանակ խնդրեց՝ պարզաբանումներ տրամադրելու համար, սակայն, ժամկետի սղության պատճառով ԿԸՀ-ն մերժեց ժամանակի տրամադրումը:
Կարդացեք նաև
Նելլի ԳՐԻԳՈՐՅԱՆ
