«Պատիվ ունեմ» դաշինքի ներկայացուցիչ Խաչիկ Գալստյանի հետ հանդիպմանն այսօր լրագրողները հետաքրքրվեցին՝ դաշինքի վարչապետի թեկնածու, ԱԱԾ նախկին պետ Արթուր Վանեցյանը նախկինում ասել էր, թե կարող է գերիների վերադարձի հարցը լուծել, հիմա այդ ուղղությամբ որեւէ քայլ կատարվե՞լ է։
Խաչիկ Գալստյանը նախ նշեց․ «Արթուր Վանեցյանն ասել է, որ եթե ինքը լիներ իշխանություն, ապա կարող էր գերիների հարցը լուծել։ Դա ոչ թե անձնական դիվանագիտության, այլ միջպետական հարաբերությունների խնդիր է։ Իշխանությունն այսօր մանիպուլյացիայի սարսափելի գործիքակազմի է տիրապետում։ Վստահ եմ, որ եթե անգամ Արթուր Վանեցյանի անձնական կապերով մի քանի գերի վերադարձվեին, իշխանական քարոզչամեքենան հանրությանը կասեր, թե Վանեցյանն Ալիեւի հետ պայմանավորվել է, գերիներին պահել է տվել, եւ հիմա հետ է բերում, որ իշխանության վարկանիշը գցի»։
Ինչ վերաբերում է Նիկոլ Փաշինյանի՝ որդուն գերիների փոխարեն Ադրբեջանին հանձնելու պատրաստակամությանը, Գալստյանը շեշտեց՝ դա քարոզչական հնարք է, բացի այդ՝ նա ավելի վաղ կարող էր նման առաջարկ հնչեցնել։
Խաչիկ Գալստյանը համոզված է, որ քանի դեռ իշխանության ղեկին Նիկոլ Փաշինյանն է, ռազմագերիները չեն վերադարձվելու, ավելին՝ նորանոր տարածքային զիջումներ են պարտադրվելու հայկական կողմին։
Կարդացեք նաև
Լուիզա ՍՈՒՔԻԱՍՅԱՆ
