«Երեք ժամ պահել են, հիմա նոր բաց են թողել: Արդեն էդ երեխեքի ծնողները ընկել էին ման էին գալիս»,- Aravot.am-ի հետ զրույցում ասաց ՀԴԿ նախընտրական ցուցակի առաջին համարը զբաղեցնող Տիգրան Արզաքանցյանն` անդրադառնալով այսօր Արտաշատում քարոզարշավից հետո եղած միջադեպին:
Ինչպես հայտնի է, քարոզարշավի ավարտից հետո ՀԴԿ շտաբի անդամներին բերման էին ենթարկել:
Պարոն Արզաքանցյանը հստակեցրեց, որ բերման են ենթարկվել իրենց ութ կուսակից եւ համակիր, այդ թվում նաեւ Մասիս քաղաքի շտաբի պետին. «Ութ հոգու տարան, մի հոգի էլ 15 տարեկան երեխայի`դրոշակ բռնող»:
Ըստ նրա, բերման ենթարկելու պատճառը եղել է մեքենայում հայտնաբերված սնունդը, որը նախատեսված է եղել իրենց աշխատակիցների համար: «Պատկերացնում ես, ուզել են, որ մեր երիտասարդներն անպայման ասեն, որ մենք այդ բուտերբրոտները բերել ենք բաժանելու համար: Բայց մենք մեզ թույլ չենք տա նման բան անենք: Էդ երեխեքը բուտերբրոտները վերցրել են իրանց համար, շտաբի աշխատողների համար, քաղմասում էլ վերցրել են ֆանտաստիկ թվեր են գրում: Մեր ժողովրդին ես բուտերբրո՞տ եմ բաժանում: Դու պատկերացնո՞ւմ ես»,- ասաց Տիգրան Արզաքանցյանը:
Կարդացեք նաև
Նա կարծում է, որ այս միջադեպը կապ ունի Գավառում քվեի դիմաց՝ սննդի տեսքով, ընտրակաշառքի հետ: Ըստ «Սպուտնիկ Արմենիայի» ոստիկանության Գավառի բաժնում տեղեկություններ են ստացվել այն մասին, որ 2021թ. հունիսի 8-ին՝ ժամը 21:20-ի սահմաններում, կուսակցություններից մեկի Գավառի տարածքային գրասենյակի ղեկավարը ընտրողներին կաշառք տալու համար գրասենյակի քարտուղարի Գավառում գտնվող բնակարան է տեղափոխել շուրջ 80 փաթեթ սննդամթերք՝ հանձնարարելով նրան ըստ ցուցակի բաժանել ընտրողներին: 2021թ. հունիսի 9-ի առավոտից սկսած՝ 8 ընտրողների որպես կաշառք տվել է մեկական փաթեթ սննդամթերք՝ յուրաքանչյուրը մոտ 7000 ՀՀ դրամ արժողությամբ։
Տիգրան Արզաքանցյանը նեղսրտած է, որ այդ դեպքը կապում են իր հետ, մինչդեռ ինքը պնդում է, որ դեպքը եղել է ԲՀԿ նախագահ Գագիկ Ծառուկյանի`Գավառ այցից հետո. «Գրել են` Գավառում սնունդ են բաժանում: Բայց էդ Ծառուկյանի այցից հետո էր: Գավառ անունն հիմա լրիվ կապում են իմ հետ: Բոլոր կուսակցություններն էլ տարբեր մարզեր գնում են, պրի չյոմ, որ կապեն մեր հետ: Իրավունք չունեն մեր հետ բան կապեն»:
Նելլի ԳՐԻԳՈՐՅԱՆ
