ՀՀ ԱԺ առողջապահության եւ սոցիալական հարցերի մշտական հանձնաժողովի հունիսի 9-ի նիստում Նարեկ Զեյնալյանի նախագահությամբ առաջին ընթերցմամբ քննարկվեց «Լուսավոր Հայաստան» խմբակցության հեղինակած «ՀՀ աշխատանքային օրենսգրքում փոփոխություն եւ լրացում կատարելու մասին» օրենքի նախագիծը: Սրբուհի Գրիգորյանի խոսքով՝ հաշմանդամություն ունեցող երեխաների խնամքն առավել խնդրահարույց է դառնում, երբ ծնողներն աշխատում են ՀՀ աշխատանքային օրենսգրքով նախատեսված ընդհանուր աշխատաժամանակի ռեժիմով: ՀՀ-ում հաշվառված է 8812 հաշմանդամություն ունեցող երեխա, նրանց ծնողներից 1700-ը գրանցված աշխատողներ են:
Ըստ զեկուցողի՝ հաշմանդամություն ունեցող երեխաների խնամքը ենթադրում է ոչ միայն նյութական միջոցների ներդրում, այլ նաեւ ժամանակի հատկացում, ինչը ծնողների հագեցած գրաֆիկով աշխատելու դեպքում դժվար իրագործելի է:
Հաշմանդամություն ունեցող երեխային խնամող ծնողների՝ աշխատավայրից բացակայելու հարցը ներկայիս իրավակարգավորումների պարագայում ամբողջությամբ գտնվում է գործատուի հայեցողության տիրույթում, եւ առկա է հարցի օրենսդրական կարգավորման անհրաժեշտություն:
Առաջարկվում է համապատասխան լրացում կատարել ՀՀ աշխատանքային օրենսգրքում, ըստ որի՝ հաշմանդամություն ունեցող երեխաների ծնողների (խնամակալների, հոգաբարձուների) համար նախատեսվում է ոչ լրիվ աշխատանքային օրվա կամ ոչ լրիվ աշխատանքային շաբաթվա ռեժիմով աշխատելու իրավունք:
Կարդացեք նաև
Գործադիրը նախագծի վերաբերյալ տվել է դրական եզրակացություն:
Լրամշակված նախագիծը ստացավ դրական եզրակացություն:
ՀՀ Ազգային ժողով
