Այսօր Շիրակի մարզի տարբեր համայնքներ՝ Մեծ Մանթաշ, Ազատան, Արթիկ, Մարալիկ այցելած Նիկոլ Փաշինյանը փոքր կանգառ ունեցավ Հոռոմ գյուղում։
Հոռոմցիները վարչապետի ժ/պ-ին ու նրան ուղեկցող գործարար, ՔՊ-ի պատգամավորի թեկնածու Խաչատուր Սուքիասյանին հյուրասիրություն արեցին՝ նրանց հետ կոնյակի բաժակ բարձրացնելով։
«Մոտեցեք սեղանին», -ասացին հոռոմցիները։ Եվ երբ Խաչատուր Սուքիասյանը հրաժարվեց, հոռոմցիները կատակով պնդեցին․ «Հոռոմը կնեղանա, մոտեցեք»։
Վարչապետ Փաշինյանը շնորհակալություն հայտնեց ընդունելության, կոնյակի ու ըմբռնման համար։
Կարդացեք նաև
«Բացի շնորհակալությունը, ես ուզում եմ նաև ներողություն խնդրել այն բացթողումների և սխալների համար, որ ձեզ տարբեր առիթներով հիասթափություն ենք պատճառել։ Բայց այն, ինչ հնարավոր է եղել, մենք արել ենք, երբեմն նույնիսկ անհնարն ենք արել»,- ասաց Նիկոլ Փաշինյանը։
Նա Հոռոմում մեկ անգամ ևս կրկնեց, որ իրենց համար վերջին ամիսներին շատ դժվար է եղել, բայց ամեն ինչ արել են, որ ժողովրդին պատկանող իշխանությունը հանկարծ ուրիշին չթողնեն։ Իսկ հիմա որոշողը ժողովուրդն է։
Երբ վարչապետի ժ/պ-ն արդեն հեռանում էր՝ կիսատ թողնելով խմիչքի բաժակը, հոռոմցիներից մեկը ճանապարհից հետ կանչեց ու հորդորեց մինչև վերջ խմել։
«Փաշինյան, խմե», ասաց նա։ Նիկոլ Փաշինյանը ժպտալով հրաժարվեց՝ ասելով, որ քարոզարշավին չի կարելի խմել։
«Մինչև չխմես՝ ձեն չենք տա, հոռոմցիները խելառ են»,- կատակեց տարեց տղամարդը։ Նիկոլ Փաշինյանը ժպտաց, որին ի պատասխան՝ տղամարդը նորից պնդեց․ «Լրիվ խմե, սրտիդ մեռնիմ» ու հարկադրեց խմել մինչև վերջին կաթիլը։
Հավաքվածները Նիկոլ Փաշինյանին չէին թողնում հեռանալ՝ հերթով սելֆի լինելով նրա հետ։
Նունե ԱՐԵՎՇԱՏՅԱՆ
