Մեղրիում տեղակայված N զորամասի հրամանատար Արգամ Գեւորգյանը ազատվել է պաշտոնից։ Ըստ Մեղրիի համայնքի ղեկավար Մխիթար Զաքարյանի՝ պատճառը քաղաքական է եղել։ Սակայն մեր աղբյուրների տեղեկատվությամբ, Գեւորգյանի ազատման պատճառը զորամասում վերջին մեկ շաբաթում տեղի ունեցած երկու զինծառայողների ինքնասպանությունն է եղել։
«Նախ այդ դեպքերը, եթե չեմ սխալվում, մոտ մեկ ամիս առաջ են եղել։ Մեկը հոգեկան առողջության խնդիրներ ունեցող երիտասարդ է եղել։ Տեղափոխել են հիվանդանոց, հետո նրա հայրը տվել է համաձայնություն, որ տղան շարունակի ծառայությունը։ Մյուսն էլ դժբախտ պատահար է եղել։ Արգամ Գեւորգյանն այդ ժամանակ Երեւանում էր, ու հրամանատարի ժամանակավոր պաշտոնակատար կար»,–Aravot.am-ի հետ հեռախոսազրույցում ասաց Մխիթար Զաքարյանը։ Վերջինս կարծում է, որ այդ դեպքերը կապ չունեն, ծառայողական քննություն էր սկսվել եւ ամեն ինչ պարզվել էր։
«Կամ ինքնասպանության դեպքերը ի՞նչ կապ ունեին ինձ հետ շփումների հետ, որ հրամանատարին բառացի կարգադրել էին ինձ հետ չշփվի, դադարեցնի կապերը»,–ասում է Զաքարյանը։
«Լավ, մի պահ ընդունենք, Արգամին ինքնասպանության դեպքերի համար են ազատել, այդ դեպքում ինչպե՞ս են բացատրում Մեհրաբի զորամասի հրամանատարի՝ Արտակ Թադեւոսյանի պաշտոնանկությունը»,–հարցնում է Մեղրիի համայնքի ղեկավարը։
Կարդացեք նաև
Aravot.am-ը հարցում է ուղարկել պաշտպանության նախարարություն՝ խնդրելով պարզաբանում, թե ի՞նչ պատճառով են ծառայությունից ազատվել Մեղրիի եւ Մեհրաբի զորամասերի հրամանատարները։
Արմեն ԴԱՎԹՅԱՆ
