«Մենք արդեն իշխանության ճանապարհին ենք։ Մենք հայտարարում ենք, որ այն ուժն ենք, որն ի վիճակի է այսօր Հայաստանը տանել դեպի պայծառ ապագա»,–Սյունիքի մարզկենտրոն Կապանում երկուշաբթի հունիսի 7-ին հայտարարեց «Հայաստան» դաշինքի նախընտրական ցուցակը գլխավորող ՀՀ երկրորդ նախագահ Ռոբերտ Քոչարյանը։
«Մեր հանդիպումները մեր քաղաքացիների հետ մեկ դերասանի թատրոն չեն, մենք ներկայանում ենք թիմով, որի անդամներից ամեն մեկը ճանապարհ է անցել, փորձ է կուտակել։ Մեկ մարդ չի կարող բոլոր հարցերը լուծել։ Այս ընտրություններն էապես տարբերվում են նախորդ բոլոր ընտրություններից»,–ասաց նա՝ նշելով, որ ընտրությունները հաշվետվություն են իշխանությունների համար։ Ապա` դիմելով կապանցիներին հարցրեց, թե արդյո՞ք տեսել են իշխանության հաշվետվությունը բացի նրանից, որ ընդդիմադիրների նկարները ձեռքերին՝ պտտվում են։
Պատասխանելով ընտրողների հարցերին՝ «Հայաստան» դաշինքի ղեկավարը իրատեսական համարեց Սյունիքում Ռուսաստանի Դաշնության ռազմաբազա տեղադրելը։ « Բայց միշտ շեշտադրում եմ անում, եթե մենք ուզում ենք, որ մեզ հարգեն, մենք պետք է ունենանք սեփական Զինված ուժեր։
Կարդացեք նաև
Ռուսական բազան, Ռուսաստանը մեր ստրատեգիական դաշնակիցն է, անկասկած, բայց եթե ուզում ենք մեր կշիռը այդ հարաբերությունում պատշաճ մակարդակի վրա լինի, մենք մեզանից ինչ–որ բան պետք է ներկայացնենք, այլ տարբերակով չեն հարգում պետություններին։ Եթե մենք ուզում ենք, որ այս հարցերն իրենց լիարժեք լուծումն ստանան գործընկերային հենքի վրա, ոչ թե աղաչելով ու խնդրելով, ուրեմն մենք շատ արագ պետք է վերականգնեք մեր բանակը եւ միասին մեր դաշնակիցների հետ ամրացնենք մեր երկրի անվտանգությունը»,–ասաց Հայաստանի երկրորդ նախագահը։
Կապանցիներին նաեւ հետաքրքրում էր Ռոբերտ Քոչարյանի կողմից՝ գույք` պարտքի դիմաց հայ-ռուսական համաձայնագրի ստորագրելը, ըստ որի՝ հայկական մի քանի ձեռնարկություններ անցան ռուսական ներդրողների կառավարմանը: Ըստ Քոչարյանի՝ բոլոր այդ գույքերը, որ «այդ գործարքի մեջ էին, մնացել են Հայաստանում, դրանց անիվներ չեն կպցրել եւ չեն տեղափոխել Ռուսաստան»:
«Իրենք Հայաստանում են, աշխատում են, Հայաստանի ռեզիդենտ են, հարկեր են մուծում, բազմաթիվ աշխատատեղեր են ստեղծել, եւ բացի դա, 100 մլն դոլար, որ պետք է դուրս գար Հայաստանից, դուրս չի եկել, մնացել է Հայաստանում»,-ասաց Քոչարյանը: Վերջինս անդրադարձավ Հրազդանի ՊՇԷԿ-ին, որն այսօր հոսանք է տալիս, եւ ամբողջ Հայաստանն օգտվում է այդ հոսանքից:
Ի դեպ, «Հայաստան» դաշինքի ղեկավարը կապանցիներին դիմելով ասաց «ղափանցիներ», Կապանին էլ «Ղափան»։
«Տեսնես երբ է նախագահը սովորելու Կապան բառը։ Ախր Ղափանը թուրքերն էին ասում»,–սրտնեղվեց Քոչարյանի համակիրներից մի կին։
Արմեն ԴԱՎԹՅԱՆ
