Ինչպես տեղեկացրել ենք, այսօր վարչապետի պաշտոնակատար Նիկոլ Փաշինյանն ու իր ղեկավարած ուժը՝ ՔՊ-ն նախընտրական քարոզարշավ էր իրականացնում Արմավիրի մարզում: Հանդիպումներից մեկից հետո մի քաղաքացի բղավել էր՝ «Նիկոլ, դավաճան»: Տելեգրամյան Mediaport ալիքը, տարածելով այդ տեսանյութը, նշել է, որ «Փաշինյանի ախրաննիկները դաժան ծեծի են ենթարկել «Նիկոլ, դավաճա՛ն» բացականչած քաղաքացուն: Ականատեսների խոսքով՝ քաղաքացուն ծանր վիճակում դրեցին մեքենան ու հեռացրեցին տեղանքից»:
Տեսանյութում միայն երեւում է, թե ինչպես են Փաշինյանի շուրջ հավաքված մարդիկ խմբով վազում այդ քաղաքացու հետեւից:
Aravot.am-ը ԱԺ փոխխոսնակ Ալեն Սիմոնյանին, որն Արմավիրում ուղեկցում էր Նիկոլ Փաշինյանին, հարցրեց՝ ճի՞շտ է, որ Փաշինյանի թիկնապահները դաժան ծեծի են ենթարկել այդ արմավիրցուն, ի՞նչ է եղել իրականում: Ալեն Սիմոնյանը պատասխանեց. «Ոչ մի թիկնապահ վարչապետին չի լքել ու չի լքում: Եվ վարչապետի անվտանգության ոչ մի անդամ նման բանի չի մասնակցել»:
Կարդացեք նաև
Քանի որ լուրեր կային, որ ծեծի ենթարկողները Խաչատուր Սուքիասյանի մարդիկ են եղել, մենք ճշտեցինք՝ բայց չե՞ք հերքում, որ ծեծել են՝ Ալեն Սիմոնյանը պատասխանեց. «Իհարկե, հերքում եմ: Ես նման բան չեմ տեսել: Գոռաց ու փախավ»:
Հռիփսիմե ՋԵԲԵՋՅԱՆ
