«Բոլոր առաջարկություններում եղել է ամբողջական դեբլոկադայի եւ կոմունիկացիաների գործարկման կետ»,- այսօր Մեղրի քաղաքում ընտրողների հետ դահլիճային հանդիպման ժամանակ ասաց «Հայաստան» դաշինքի նախընտրական ցուցակը գլխավորող Ռոբերտ Քոչարյանը։ Հիշեցնենք՝ «Մեղրիի միջանցքի» մասին հարց հնչել էր նաեւ Ագարակում։
Ռոբերտ Քոչարյանը վերահաստատեց իր մոտեցումը՝ միջանցքի մասին խոսք լինել չի կարող։
Թեման շարունակելով՝ Ռոբերտ Քոչարյանն ասաց, որ շատերն այն տեսակետին են, թե միջանցքը Թուրքիան դիտարկում է պանթուրքիստական ծրագրերի շրջանակներում, սակայն, իր կարծիքով՝ միջանցքը Թուրքիան տեսնում է իր նեոօսմանական փառքի վերականգնման համատեքստում։
Պատասխանելով Նռնաձորի համայնքապետի հարցին, Ռոբերտ Քոչարյանն ասաց, որ իր համար անընդունելի է, երբ գերիների հարցը չլուծված՝ հայկական կողմը ինչ-որ հարցերի շուրջ բանակցում է Ադրբեջանի հետ։ Բայց նա վստահեցրեց, որ կոմունիկացիաների հարցը արագ լուծվող հարց չէ. «Իրենք մեզնից այլ ակնկալիքներ ունեն, որոնք մինչեւ ամսի 20-ը չեն ստանալու։ Իսկ 20-ից հետո հաստատ չեն ստանալու»։
Կարդացեք նաև
Մեղրիի բժշկական կենտրոնի վիրաբույժ Արմեն Օհանջանյանը Ռոբերտ Քոչարյանին հարց հղեց Հայաստանի նախկին իշխանությունների գործունեությանը, մասնավորաբար՝ Լեւոն Տեր-Պետրոսյանի եւ Նիկոլ Փաշինյանի իշխանավարման շրջաններին քաղաքական գնահատական տալու մասին։ Բժշկի համոզմամբ՝ մեր «դժգույն եւ դժբախտ» իրականությունը հենց Տեր-Պետրոսյանի պաշտոնավարման շրջանի արդյունք է։ Ռոբերտ Քոչարյանը համաձայնեց, որ ժամանակին իր թերացումներից մեկն էլ նախկին իշխանության գործունեությանը քաղաքական գնահատական չտալն էր։ Նա բացատրեց, որ այդպիսով չի ցանկացել երկիրը խեղդել անցյալում՝ ինչպես վարվում է այսօրվա իշխանությունը, այլ գերադասել էր զբաղվել խնդիրներով եւ դրանց լուծումներով։ «20-ից հետո պետք է լինելու գնահատականներ տալ»,- ասաց Ռոբերտ Քոչարյանը։
Այլ մանրամասները՝ շուտով տեսանյութում։
Նելլի ԳՐԻԳՈՐՅԱՆ
