Հայ կառուցողական կուսակցության նախագահ, «Ազատ հայրենիք» դաշինքի վարչապետի թեկնածու Անդրիաս Ղուկասյանի ներկայացմամբ, այս դաշինքում միավորման գլխավոր նպատակը անվտանգության համակարգի վերականգնումն է:
«Ազատ հայրենիք» դաշինքն այսօր ներկայացնում էր նախընտրական ծրագիրը:
Դաշինքում շատ կարեւորում են նաեւ հանրության հոգեւոր անվտանգության ապահովումը: Իսկ այդ նպատակների իրականացումը հնարավոր են համարում միայն անկախ արտաքին քաղաքականության գոյության պարագայում: Հայաստանն, ըստ բանախոսի, մինչ օրս իր ընտրած միակողմանի արտաքին քաղաքականությամբ, չի կարող դրանք իրացնել առկա, մինչդեռ բազմաթիվ պետություններ` ԱՄՆ-ը, Ֆրանսիան, եվրոպական այլ պետություններ, աջակցություն են հայտնում մեզ:
ԱՀ-ի ճանաչման հարցը նույնպես դաշինքի օրակարգում է: Կարծում են, որ սա հստակություն է մտցնում մեր պետության դիրքորոշման մեջ. «ԱՀ ճանաչումը, Արցախի տարածքային ամբողջականության ճանաչումն այն նախապայմաններն են, որոնց առկայության պարագայում կարող է խաղաղություն ճանաչվել Ադրբեջանի հանրապետության հետ: Առանց Շուշիի, Հադրութի, Շահումյանի շրջանի հետ վերադարձի հայկական վերահսկողության տակ, խաղաղության որեւէ տարբերակ հայկական կողմին չի կարող պարտադրվել»:
Կարդացեք նաև
Տնտեսության կայուն զարգացումը նույնպես դաշինքի գլխավոր նպատակներից է: Այն փոխկապակցված է հայրենադարձության հետ, ազգային-բնական ռեսուրսների անվտանգ եւ թափանցիկ օգտագործման, ֆինանսավարկային բարեփոխումների իրականացման, հարկային բեռի նվազեցման, ժամանակակից գիտակրթական համակարգի ներդրման հետ: Վերջին կոմպոնենտն առնչվում է նաեւ անվտանգության համակարգի ամրապնդման հետ: Դաշինքում չեն անտեսել հասանելի առողջապահական համակարգի գոյությունը: Ընդհանուր առմամբ, հռչակել են 12 առաջնահերթություն:
Այս նպատակներին հասնելու ճանապարհային քարտեզը կհրապարակվի քարոզարշավի առաջին օրը` ԿԸՀ կայքում ծրագրի հրապարակմամբ:
Անդրիաս Ղուկասյանն անդրադարձավ անվտանգային գործոնին` ասելով. «Տարածաշրջանում անվտանգություն` խաղաղության դիրքերից, քանի դեռ կան Իլհամ Ալիեւի ռեժիմը, Էրդողանի ռեժիմը, լինելու է անհասանելի: Ուստի, մեր անվտանգությունը պետք է լինի ուժի դիրքից: Հայկական բանակը պետք է վերազինվի, վերապատրաստվի եւ մենք ունենք ճանապարհ` ինչպես դա անել, այդ թվում, օգտագործելով միջազգային օժանդակությունը: Հայկական բանակը պիտի համապատասխանի եվրոպական չափանիշներին եւ ի վիճակի լինի վերականգնել ռազմական բալանսը տարածաշրջանում: Հայկական բանակի հզորությունը պետեք բավարար լինի Ադրբեջանին պարտության հասցնելու համար եւ Թուրքիայից հարվածներ կանխելու համար»: Բանակի վերազինման, վերապատրաստման եւ վերակազմակերպման հարցում անհրաժեշտ է լինելու ողջ հանրության ներուժը:
Այս հարցերի հենարանը տնտեսական զարգացումն է: Վերլուծելով իրավիճակը, դաշինքում գտել են դրա բանալին` Աբել Աղամբեկյանի առաջարկներով ՀՀ-ում արդյունաբերության վերականգնումն է: Դաշինքում գտնում են, որ հարկավոր է ստեղծել ութ արդյունաբերական կենտրոններ` պետության կողմից հողատարածքներ հատկացնելով միջազգային ընկերություններին, որոնք տեխնոլոգիաներ եւ գիտելիք կբերեն մեր երկիր: Արդյունավետ գործելու անհրաժեշտ պայմանները եւ ինֆրաստրուկտուրաները թողնվում են պետության պատասխանատվության վրա: «Այլեւս երբեք, Հայաստանում արտասահմանյան ներդրումները չպետք է դառնան պաշտոնյաների հարստացման աղբյուր»,- ասաց նա:
Մանրամասները` տեսանյութում
Նելլի ԳՐԻԳՈՐՅԱՆ
