«Իսկ դո՞ւք: Դուք անպայման կուզենայիք, որ մենք բանտո՞ւմ լինեինք, դրանից հաճո՞ւյք կստանայիք, դրանից մեծ բավարարվածություն կլիներ, դրանից 44-օրյա պատերազմը չէր լինի, դրանից 5000 տղաները չէին զոհվի, դրանից 10 հազար մարդ չէր վիրավորվի»,- այսօր կայացած մամուլի ասուլիսում, լրագրողի հարցին հարցով պատասխանեց «Հայաստան» դաշինքի նախընտրական շտաբի պետ Արմեն Գեւորգյանը: Իսկ հարցը վերաբերում էր դաշինքի նախընտրական ցուցակը ղեկավարող ՀՀ երկրորդ նախագահ Ռոբերտ Քոչարյանի երեկ արած այդ դիտարկմանը, որ այս իշխանությունները ոչ մի խոստում չեն կատարել այս երեք տարիների ընթացքում, անգամ խոստացել էին իրեն դատեին, դա էլ չեն արել. դո՞ւք էլ եք հիասթափված, որ բանտում չենք:
Անդրադառնալով իր դեմ հարուցված քրեական գործին էլ, Արմեն Գեւորգյանն ասաց, որ այնտեղ որեւէ հիմք չկա. «Կարծում եմ, դուք էլ եք դրանում համոզվել՝ ՍԴ որոշումից հետո: Բոլոր քրեական գործերը, որոնցով ինձ հետ փոխկապացված անցնում են, դրանք շինծու են»: Նա նաեւ հավելեց, որ այսօր առավել առաջնային հարցեր կան քննարկելու, որոնք վերաբերում են երկրի առջեւ ծառացած խնդիրներին, առաջիկա ընտրություններին, գործող իշխանության որակներին, զոհված տղաների դիակների պահման վայրերին, հանրության անտեղյակությանը, գերիների խնդիրներին. «Այ երբ կլինենք իշխանության, այն ժամանակ կձեռնարկենք այն բոլոր քայլերը, որոնք այսօրվա իշխանությունները չեն ձեռնարկում, իսկ դուք կլուսաբանեք այդ քայլերը»:
Ընտրակաշառքների մասին խորհրդարանում Նիկոլ Փաշինյանի արած հայտարարությանը, թե ուրախ է, որ ընտրակաշառք բաժանողն իշխանությունը չէ եւ հարցին, արդյոք «Հայաստան» դաշի՞նքն է ընտրակաշառք բաժանողը, Արմեն Գեւորգյանը պատասխանեց. «Դուք ինձ ճանաչում եք. երբեւիցե տեսե՞լ եք, որ ես տարօրինակ հարցերի պատասխանեմ: Ես խնդրում եմ՝ կամ բովանդակալից հարցեր տվեք, կամ՝ ըստ էության: Ես հիմա նստեմ պատասխանեմ, թե Նիկոլն ինչ է ասել՝ Էդմոնին ի պատասխա՞ն… (ուսերն է թոթվում-Ն. Գ.)»: Նա հորդորեց Էդմոն Մարուքյանին ուղղել հարցերը, որը ընդդիմությանը մեղադրել էր ընտրակաշառք բաժանելու մեջ: Իսկ դաշինքի կողմից ընտրակաշառք բաժանելու մասով էլ հստակեցրեց, որ իրենք այդ հարցին քանիցս են անդրադարձել՝ պաշտոնական հայտարարություններով:
Կարդացեք նաև
Նելլի ԳՐԻԳՈՐՅԱՆ
