«Ամենայն Հայոց Կաթողիկոսի այցը սպասված էր, կարծես խաղաղվեցինք մի տեսակ, չէ որ հավատքով ժողովուրդ ենք մենք՝ սյունեցիներս»,–Aravot.am-ի հետ զրույցում ասաց Գորիսի համայնքի ղեկավարի տեղակալ Իրինա Յոլյանը։ Նրա խոսքով, Գորիսի մուտքի մոտ Վեհափառին դիմավորեցին ոչ միայն գորիսեցիները, այլ Սյունիքի տարբեր բնակավայրերում ապրողները։
Նշենք, որ Ամենայն հայոց կաթողիկոսը հինգշաբթի մեկնել էր Սյունիք եւ Արցախ։
Գորիս կատարած հովվապետական այցի շրջանակներում Ամենայն Հայոց Կաթողիկոսը եղավ զոհված զինվորականների եւ ազատամարտիկների պանթեոնում։
Կարդացեք նաև
«Վեհափառի ստորագրությամբ Գորիսի զինվորական պանթեոնի նախագիծը հաստատվեց։ Ծանոթանալով պանթեոնի տարածքի կառուցման նախագծին` Վեհափառը իր աջակցությունը հայտնեց նախագծի, մատուռի կառուցման աշխատանքների իրականացմանը»,–ասաց Իրինա Յոլյանը։
Կաթողիկոսը օրհնված խաչեր նվիրեց ինչպես զոհված ազատամարտիկների երեխաներին, այնպես էլ Շուռնուխ սահմանամերձ բնակավայրում ապրող բոլոր երեխաներին։ «Մեր կաթողիկոսը ասաց, որ չէր կարող հասնել Սյունիք, գնալ Արցախ՝ առանց Շուռնուխ մտնելու։ Մեզ բոլորիս տոկունություն, զորակցություն, համբերություն մաղթեց։ Օրհնեց, որ Աստված զորավիգ լինի շուռնուխցիներին»,-Aravot.am-ի հետ ասաց Շուռնուխ բնակավայրի վարչական ղեկավար Հակոբ Արշակյանը։ Չնայած Կաթողիկոսի ժամանակը սուղ էր, բայց Հակոբ Արշակյանի խոսքով՝ մոտ մեկ ժամ նա անցկացրեց շուռնուխցիների հետ։ «Չէր մերժում ոչ մեկին, երկու ամսական երեխայի օրհնեց, կնքեց, բոլոր մոտեցողների հետ խոսում էր, տալիս հայրապետական օրհնանքը»,–ասում է Շուռնուխի ղեկավարը։
Գարեգին Բ կաթողիկոսը այցելեց նաեւ շուռնուխցի երկու ընտանիքի, որոնց տները 2020 թվականի նոյեմբերի 9-ի եռակողմ համաձայնագրից հետո մնացել են ադրբեջանական հսկողության ներքո։ «Մանրանկարներ նվիրեց այդ ընտանիքներին՝ Հիսուսի Խաչն ու Հիսուսի ծնունդը պատկերող նկարներ։ Բնակիչները իրենց հոգսերը պատմեցին Կաթողիկոսին, նա էլ լռելյայն լսեց ու աղոթեց առ Աստված»,–նշեց Արշակյանը։
Վեհափառ Տերն ու նրան ուղեկցողները Շուռնուխում Արցախյան առաջին պատերազմում զոհված հերոսների պատվին կանգնեցրած հուշարձանին հատուկ կարգ մատուցեցին եւ ծաղկեդրման արարողություն կատարեցին։
«Վերջում էլ մեր գյուղացի Սպարտակ Հակոբյանի եւ նրա կնոջ՝ Էմիլիայի պսակադրությունը օրհնեց։ Հարսանիքը Կապանում էին արել, քանի որ Սպարտակի պապիկը Կապանում է մնում եւ ուզեց այնտեղ թոռան ուրախությունը նշի։ Եվ հետո գյուղում այդպիսի տարածք էլ չկա, որ հարսանիք անեինք»,–ասում է Հակոբ Արշակյանը՝ ավելացնելով, որ պատերազմից հետո սա գյուղում առաջին պսակադրությունն էր։
Շուռնուխի վարչական ղեկավարը համոզված է, որ Կաթողիկոսի այցից հետո կյանքը կփոխվի, եւ Շուռնուխում առաջիկայում ավելի շատ հարսանիքի զուռնան կհնչի եւ նորածնի ճիչ կլսվի։
Արմեն ԴԱՎԹՅԱՆ
