ՀՀ Վայոց Ձորի մարզպետի տեղակալ Նանե Ասատրյանն այսօր ընդունել է ԵԱՀԿ ժողովրդավարական հաստատությունների և մարդու իրավունքների գրասենյակի (ԺՀՄԻԳ)՝ հունիսի 20-ին կայանալիք ԱԺ արտահերթ ընտրությունների դիտորդական առաքելության ներկայացուցիչներ՝ Մարիան դե Վիտոյին և Մարկ Ուոլերին, ովքեր աշխատելու են Վայոց ձորի մարզում։
Ողջունելով դիտորդներին՝ մարզպետի տեղակալը կարևորեց ցանկացած քաղաքական գործընթացի, առավել ևս Աժ ընտրությունների օրենքով սահմանված կարգով իրականացումը, ընդգծելով դիտորդների դերն այդ գործընթացում:
Մարզպետի տեղակալը բարձր գնահատեց մարդու իրավունքների գերակայությունը անկախ ընտրությունների արդյունքներից և նշեց, որ ամեն բան արվելու է, որպեսզի մարզպետարանի աշխատանքը որպես պետական կառույցի, համապատասխանի ժողովրդավարության սկզբունքներին: Տիկին Ասատրյանն անդրադառնալով դիտորդների կողմից բարձրացված հարցերին նշեց նաև, որ մարզպետ Արարատ Գրիգորյանի նախընտրական ցուցակում ընդգրկված լինելը չի խոչընդոտելու պետական աշխատանքի պատշաճ կազմակերպմանը:
Դիտորդական առաքելության ներկայացուցիչները շնորհակալություն հայտնեցին Նանե Ասատրյանին ընդունելության և արդյունավետ զրույցի համար՝ կարևորելով մարզպետի տեղակալի պատրաստակամությունն ընտրական գործընթացն առանց խախտումների անցկացնելու հանգամանքը։
Կարդացեք նաև
Վայոց Ձորի մարզպետարան
