Հունիսի 2-ին Կապան համայնքի ղեկավար Գևորգ Փարսյանը ընդունել է Հայաստանում ՄԱԿ–ի մշտական համակարգող Շոմբի Շարփին։
Համայնքի ղեկավարը նախ ողջունել է պարոն Շարփին և շնորհակալություն հայտնել նրան Կապան այցելության համար։ Ինչպես նաև բարձր է գնահատել ՄԱԿ–ի փախստականների գրասենյակի հետ արդյունավետ համագործակցությունը և շնորհակալություն հայտնել համայնքում ապաստանած քաղաքացիներին մինչ այժմ ցուցաբերած աջակցության համար։
Զրույցի ընթացքում Գ․ Փարսյանը առաջնահերթ է համարել հատկապես Ադրբեջանի վերահսկողության տակ անցած տարածքներից տեղահանված և համայնքի սահմանամերձ բնակավայրերում ապաստանած քաղաքացիների համար աշխատատեղերի ստեղծման, տնտեսության զարգացման և կենսապահովմանն ուղղված ծրագրերի իրականացումը՝ ընդգծելով աջակցության երկարաժամկետության կարևորությունը։
Այս համատեքստում պրն Շարփը ներկայացրել է ՄԱԿ–ի զարգացման ծրագրի սպասվելիք փոփոխությունը, որով նախատեսվում է մարդասիրական օգնությունից անցում կատարել դեպի երկարաժամկետ ինտեգրմանն ուղղված աջակցություն։
Կարդացեք նաև
Կողմերը զրուցել են նաև փոխադարձ հետաքրքրություն ներկայացնող մի շարք թեմաների շուրջ և երկուստեք կարևորել հեռանկարային համագործակցությունը։
Կապանի համայնքապետարան
