«Շարունակում եմ չհամարել, որ այսօր կարեւոր խնդիրն, օրինակ, ավտոմոբիլային տրանսպորտի մասին օրենքի փոփոխություններն են։ Պնդում եմ, որ այս դահլիճում վիրտուալ կյանքից պետք է վերադառնանք իրական կյանք եւ քննարկենք, օրինակ, թե ինչպես եղավ, որ հերոսների դիակները կարտոֆիլի նման լցվել էին պարկերը եւ տեղափոխվում էին դիահերձարանից դիահերձարան»,-ԱԺ արտահերթ նիստում այսօր հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը։
«Եղել եմ Կոտայքի դիահերձարանում ու տեսել այդ զարհուրելի տեսարանը։ Ինչպես եղավ, որ սանիտարն ու բաժնի պետն են մենակ պատասխանատվության ենթարկվում՝ այն դեպքում, երբ Կոտայքի դիահերձարանում տասը դիակի տեղ կա։ Հայտարարվում է, թե կարող են նաեւ ադրբեջանցիներ լինել։ Իսկ կարո՞ղ է մի օր էլ հայտարարեք, որ ծնողներից մեկին տվել եք ադրբեջանցու դի․․․ Այստեղ պետք է քննարկվեր ԱԱԾ նախկին տնօրենի հայտարարություններն այն մասին, թե քանի անգամ էր հնարավոր կանգնեցնել պատերազմը, թե ռուսական կողմն իրեն ասել է, որ մի քանի ժամ էլ, ու Ստեփանակերտը կընկնի, բայց Նիկոլ Փաշինյանը հրաժարվել է դա քննարկել ԱԽ նիստում։ Այստեղ պետք է քննարկվեր նաեւ այն, որ տասնյակ միլիոնավոր դրամների միջոցներ են տրվում գյուղական համայնքներին, եւ սա քրեական հանցագործություն է։ Գյուղապետերը չեն թաքցնում, որ ընտրություններից առաջ այսպես խրախուսում են գյուղերին»,-նշեց Նաիրա Զոհրաբյանը։ Նա հարցադրում արեց՝ ի՞նչ է վերջինս, եթե ոչ ընտրակաշառք։
Լուիզա ՍՈՒՔԻԱՍՅԱՆ
