«Մինչ Սյունիք գործուղվելս, երեք ամիս Տավուշի մարզում եմ աշխատել։ Եթե չեմ սխալվում արդեն 8–րդ ամիսն է, ինչ գործուղման մեջ եմ։ Այո՛, այդպես է ստացվել,ես չեմ կարող Երեւանում՝ կաբինետում նստած աշխատել»,–Aravot.am–ի հետ զրույցում նշում է Սյունիքի հարցերով միջգերատեսչական հանձնաժողովի նախագահ, վարչապետի խորհրդական Ռոբերտ Ղուկասյանը։
Հիշեցնեմ, որ վարչապետի պաշտոնակատար Նիկոլ Փաշինյանը մայիսի 24-ի որոշմամբ, Ռոբերտ Ղուկասյանի գործուղումը Սյունիքի մարզ երկարաձգվեց եւս մեկ ամսով՝ մինչեւ հունիսի 24-ը։ Գործուղման երկարաձգումը քննարկումների առիթ դարձավ հանրության շրջանում։
«Պիտի գամ ու մնամ այստեղ, ինչքան որ հնարավոր եւ աջակցեմ մինչեւ վերջ։ Հիմնականում Սյունիքում եմ լինում։ Եթե ինչ–որ մարդիկ նեղվում են, որ ես այստեղ եմ, օգնում եմ գյուղացուն՝ չգիտեմ ինչ ասեմ»,–նշում է վարչապետի խորհրդականը։
Կարդացեք նաև
Ի դեպ, սահմանամերձ գյուղերի բնակիչները մեզ հետ զրույցում նշեցին, որ Ղուկասյանը հաճախ է հանդիպում իրենց, փորձում՝ գյուղերում որեւէ հարց լուծել։ Մեր այն դիտարկմանը, թե հանդիպումներն արդյո՞ք օգուտ տալիս են, Շիկահող սահմանամերձ գյուղի բնակիչ Սամվել Աղաբեկյանը ցույց տալով գյուղ բերած մոտոբլոկներն ու խոտհնձիչները՝ ասում է․ «Բա սա օգուտ չի՞, էդքան իզուր հո՞ չի գնում –գալիս, կամաց–կամաց կլինի»։
Նշեմ, որ երեքշաբթի՝ հունիսի 2-ին, Շիկահողում կայացավ Սյունիքի հարցերով միջգերատեսչական հանձնաժողովի հերթական նիստը։
Միաժամանակ, 5 սահմանամերձ՝ Շիկահող, Բարգուշատ, Ծավ, Սրաշեն, Ուժանիս եւ Խդրանց համայնքների բնակիչներին հատկացվեցին խոտհնձիչներ եւ մոտոբլոկներ։
Այս մասին ավելի մանրամասն առաջիկայում։
Արմեն ԴԱՎԹՅԱՆ
