«Մենք հարցումներ չենք անցկացրել, բայց եղած հարցումներով մենք անցողիկ ենք միանշանակ: Իմ խնդիրը չի՝ ժողովուրդը ինձ քվե կտա՞, թե՞ չի տա, իմ խնդիրն է մարդկանց բացատրել, որ այս երկիրն ապագա ունի, տանը ճամպրուկդ մի՛ հավաքիր: 6000 զոհ այն ժամանակ ենք տվել, 4000-ից ավելին հիմա, դա անիմաստ չի՛: Թե՛ Ղարաբաղը պահելու հնարավորություն կա, թե՛ այս երկիրը պահելու հնարավորություն կա, ճամպրուկդ մի՛ հավաքիր»,-այսօր Aravot.am-ի հետ զրույցում ասաց «Հանրապետություն» կուսակցության նախագահ Արամ Սարգսյանը:
Նա վստահեցրեց, որ երկրում թե՛ մարդկային, թե՛ բնական ռեսուրսներ կան ու այդ ամեն ինչի հիման վրա կարելի է վեր կենալ ու երկիրը երկիր սարքել. «Դե եկեք բնութագրենք՝ հրդեհ է, չգիտեմ ինչ է…Դրանից բա՞ն է փոխվում: Կամ ես եմ ու հնարավոր է: Հիմա 6 գերի ունենք ի՞նչ է առաջարկում այդ Ռոբերտ Քոչարյանը, ի՞նչ է ասում: Ես ասեմ ինչ ասում: Ինքը այսօր գործող իշխանության վրա իր ոտքերն է սրբում ու ուղարկում բանակցության, այ է՛դ է անում, խի ինքը չգիտի՞, որ ուժով չենք կարող այդ 6 գերի ընկածին հետ բերել, չի՞ հասկանում, թե այդ մարդկանց ընտանիքներն ինչ են զգում, չի՞ հասկանում, թե ես ու դուք ինչ ենք զգում քնելուց, երբ այդ մարդիկ այնտեղ են: Շատ լավ հասկանում է, չէ՞: Շատ լավ հասկանում է, որ ամեն օրը խնդիր է: Շատ լավ հասկանում է՝ եթե ամեն ինչը խնդիր է, վաղը պիտի Նիկոլ Փաշինյանը բանակցի: Ինքը, որ ոտքերը սրբում է Նիկոլ Փաշինյանի վրա, ուղարկում է Ալիեւի մոտ, ի՞նչ է մտածում: Կամ առաջին նախագահն ի՞նչ է մտածում, հայրենի՞քն են սիրում, թե՞ գերիներին են սիրում»:
Մեր դիտարկմանը, որ նրանք քննադատում են, որ նախ չպիտի հասներ այդ վիճակին, որ գերի ընկնեին՝ Արամ Սարգսյանը պատասխանեց. «Լսեք, ես էլ կարող եմ քննադատել, թե 2014-2016 թթ-ին ինչ է եղել, բայց ես պատմաբան չեմ, չէ՞, գործող քաղաքական գործիչ եմ: Իրենք գործող քաղաքական գործի՞չ են, թե՞ քաղվերլուծաբան: Հիմա քննադատում են, թե նախկինում ինչ է եղել: Նախկինում այդ նախագահի հետ՝ ուժեղ տղու նախագահության ժամանակ Հոկտեմբերի 27 է եղել ԱԺ դահլիճում՝ այդքան մարդու ներկայությամբ ու այսօր իրենք կանգնում ասում են՝ Երեւանի կենտրոնում մարդ են խփել ու սարքում են մատի փաթաթան: Իր ներկայությամբ «Պապլավոկում» մարդ են սպանել ծեծելով, այսօր իրենք Երեւան քաղաքում կրիմինալ ռազբորկան սարքել են քաղաքական խնդիր: Իրենք դիահերձարանում տեղի ունեցածը այնպիսի շոու սարքեցին, որ այսօր մեր դեմ է, լսեք Ադրբեջանի մամուլի խոսնակը՝ այդ Լեյլան ոնց է դա մեզ դեմ տալիս: Վերջը այս լրատվությունը պիտի չափ ունենա, չէ՞, չի՛ կարելի: Չի կարելի ասել՝ բանակ չունենք: Այդ տղերքը սահմանում կանգնած ձեռնամարտով մեր գիշերվա քնելն են պահում, մենք բանակ չունե՞նք»:
Հարցին՝ էլի ԶԼՄ-նե՞րն են դրանում մեղավոր՝ Արամ Սարգսյանը պատասխանեց, որ խոսքը ոչ թե բարեխիղճ ԶԼՄ-ների, այլ այն մի քանիսի մասին է, որոնք դա նկարել են ու սարքել թոփ թեմա:
Կարդացեք նաև
Անդրադառնալով ընտրություններին՝ հարցին, թե ի՞նչ հավակնություններ ունեն՝ նա պատասխանեց. «Մենք ոչ թե մտել ենք այս քարոզարշավի մեջ ինչ-որ մեկին հաղթելու համար, կամ ինչ-որ մեկից առաջ լինելու, իհարկե, այդ սպորտային մրցակցությունը կա, բայց խնդիրը երկրինն է: Մենք տեսնում ենք, որ մասնակցող գրեթե բոլոր քաղաքական ուժերը մասնակցում են՝ Ռուսաստանին դուր գալու համար, իսկ ՌԴ-ի հետ մենք ի՞նչ ապագա ունենք: Ու ընդհանրապես աշխարհի այն երկրները, որոնք ՌԴ-ի հետ են կապել իրենց ապագան, ինչ ապագա ունեն՝ Լիբիա, Սիրիայից բռնած, մինչեւ Բելառուս, մենք այդ տեսել ենք: Մենք այլընտրանքային կարծիք ունենք, լուծումներ ենք առաջարկում: ՀՀ քաղաքացին պետք է ընտրություն կատարի ոչ թե նրա համար, թե ով ինչ ակնկալիք ունի, ով է հաղթելու, ով է պարտվելու, ինքը ուղղակի պիտի լսի, թե ով ինչ է առաջարկում ու ինչքանով է այդ առաջարկածը իրականություն դառնալու հնարավորություն ունենալու: Օրինակ, ես ասում եմ՝ կգանք ու հանքերը կբացենք: Ինքը գիտի, որ հանքերը կան, որ բացես, կաշխատի, ինքը գիտի, որ այդ հանքերում պղինձ ու ոսկի կա, այդտեղից կարող է փող լինել: Ես հստակ բաներ եմ ասում՝ շատ կոնկրետ: Ես ասում եմ, որ 8-րդ եւ 9-րդ կետերը՝ գերիներ ու միջանցքը, դրանք նույն հարթության վրա են ու այստեղ Մակրոնը ճիշտ է, դա կապ չունի Ղարաբաղի հետ: Տարանցիկ ճանապարհների, գերիների եւ Սյունիքում խախտված սահմանների խնդիրը պիտի տեղափոխվի ՄԱԿ-ի Անվտանգության խորհուրդ: Ես հստակ բաներ եմ ասում ու մարդը պիտի նայի՝ եթե ինքը ընտրում է գաղափարը, ինքն ընտրում է իրեն, եթե ինքն ընտրում է հաղթողին կամ պարտվողին, ինքն ընտրում է կա՛մ նախկիններին, կա՛մ ներկաներին: Մեր պայքարը այդ հարթության մեջ չի: Ժողովուրդը կշահի, եթե մենք խորհրդարանում լինենք հնարավորինս մեծ թվով եւ կշահի նաեւ ցանկացած իշխանություն դրանից, որ Հայաստանի խորհրդարանում արեւմտյան արժեքներ կրող ուժ լինի»:
Հարցին՝ դուք չեք հայտարարում, որ հետընտրական կոալիցիա չեք կազմի իշխող ուժի հետ՝ Արամ Սարգսյանը արձագանքեց. «Մենք երբեք էլ չենք ասում, որ կոալիցիա ենք կազմելու Փաշինյանի հետ»: Դիտարկմանը, որ չեք էլ բացառում ու ձեզ որպես այլընտրանք ոնց են դիտարկելու՝ Արամ Սարգսյանը պատասխանեց. «Ամեն ինչի որոշումը ժողովուրդն անում է տվյալ պահին: Ընտրություններից հետո խորհրդարանական համակարգը, որին մենք մշտապես ու կատեգորիկ դեմ ենք եղել, Նիկոլ Փաշինյանը համարել է, որ դա կեղծ օրակարգ է: Դուք հիշում եք, թե այն ժամանակ ես ինչքան ակտիվ «ՈՉ»-ի կողմնակից էի: Այս համակարգը աշխատող չի: Հիմա գնացինք, ԱԺ-ում անցանք, որեւէ ուժ մեծամասնություն չի կազմում ու երկիրը այս վիճակով նորից գնում է երկրորդ փուլ ընտրության: Այդ ժամանակ, եթե հանրությունը գտնում է, որ պետք է երկրորդ փուլի գնալ, մենք որեւէ մեկի հետ կոալիցիա չենք կազմի, կգնանք երկրորդ փուլ: Եթե հանրությունը կգտնի, որ զզվել ենք այս վիճակից, սահմաններում էլ վտանգավոր է, պիտի կոալիցիա կազմվի ինչ-որ ձեւով, երկրորդ փուլ չլինի, ուրեմն մենք կգնանք կոալիցիա կազմելու: Կան որոշակի ուժեր, որոնց հետ մեր կոալիցիա կազմելը անհասկանալի կլինի ու ընկալելի չի լինի, դա նախկին իշխանություններն են: Բայց որեւէ կերպ դա էլ բացառել…Գիտեք, կարող է թշնամին հարձակվի եւ այնպիսի վիճակ լինի, որտեղ բոլորիս համախմբումը գերկարեւոր լինի: Այդ պարագայում մենք չենք բացառում որեւէ մեկի հետ, բայց Աստված չանի այդ կարգի վիճակ լինի»:
Արամ Սարգսյանն ասաց, որ այն մարդիկ, որոնք չեն ուզում իրենց ընտրեն, դա պատճառ են ուղղակի բերում, թե կոալիցիա կազմելը չեք բացառել. «Չեն ուզում նախկիններին ընտրեն, չեն ուզում նորերին ընտրեն, չեն ուզում ընտրության գան ու մեր հետ էլ այդքան չունեն, պատճառ են բռնում, թե՝ թող ասեն, որ իր հետ կոալիցիա չեն կազմի՝ քվե կտանք: Չէ: Մենք նման բան չենք ասի»:
Հռիփսիմե ՋԵԲԵՋՅԱՆ
