2020-ի բյուջեի կատարման քննարկումները ԱԺ հանձնաժողովների համատեղ նիստում շարունակվում են:
«Իմ քայլի» պատգամավոր Հովիկ Աղազարյանը ֆինանսների նախարարի պաշտոնակատար Ատոմ Ջանջուղազյանին հարցրեց պարգեւավճարների մասին. «Կներեք անգրագիտությանս, Ազգային ժողովի աշխատակազմը պետական կառավարման համակարգի աշխատողնե՞ր են, թե՞ ոչ, որովհետեւ իրենք պարգեւավճարները ստացել են, իսկ պատգամավորները չեն ստացել վերջին տարում: Որեւէ մարմին որ պարգեւավճար է վճարում, արդյոք բոլոր աշխատողներին չի՞ վճարում: Ձեր այդ դատողությունները, որ արդյունավետ լինի A միավորի աշխատանքը, այդ խնդիրը լուծվո՞ւմ է, թե՞ հավասարաչափ պետք է բոլորին տալ»:
Ատոմ Ջանջուղազյանը պատասխանեց. «Այո, պետական համակարգի աշխատողներ են: Շարունակությունը ինձ չուղղված հարց է, կդիմեք ԱԺ ղեկավարությանը, որովհետեւ որոշումը կայացնողը տվյալ մարմնի ղեկավարն է: Արդյոք բոլորին է վճարվում, թե ոչ՝ որեւէ պարտադիր պահանջ չկա: Ենթադրվում է, որ այն կապվում է արդյունքի հետ յուրաքանչյուր աշխատողի կատարած աշխատանքի, որ դա առաջացնի խթաններ կոնկրետ աշխատողների համար ու ավելի մոտիվացված աշխատեն»:
Հռիփսիմե ՋԵԲԵՋՅԱՆ
