Դիմում Հայաստանի Հանրապետության Ազգային Ժողովին
Դիմում Արցախի Հանրապետության Ազգային Ժողովին
Պատմական այս պահին Հայաստանի և նրա անբաժան մասը կազմող Արցախի համար եկել է վճռական լուծումների պահը:
Պետք է դրսևորել կամք և քաջակորով վճռականություն:
Կարդացեք նաև
Կամքը և այդ վճռականությունը պետք է դրսևորեն ժողովրդի ընտրյալները կամ ժողովրդի ձայնով իշխանության եկածները, որոնք սահմանադրության ուժով պարտադրված են լուծել ազգի և երկրի առաջ ծագած խնդիրները, ուստի մենք կոչ ենք անում Արցախի Հանրապետության Ազգային ժողովին պահանջատիրության դիրքերից դիմել պատկան մարմիններին՝ ճանաչելու Արցախի անկախ Հանրապետությունը:
Կոչ ենք անում նաև Հայաստանի Հանրապետության Ազգային ժողովին անհապաղ սկսել քննարկումներ և դրանց արդյունքում ճանաչել Արցախի Հանրապետությունը՝ հաշվի առնելով, որ այս պահին Արցախի Հանրապետության անկախության ճանաչումից է կախված հայ ազգի ճակատագիրը, Արցախի ժողովրդի ֆիզիկական ապահովությունը:
Հաշվի առնելով «անջատում հանուն փրկության» սկզբունքը, նաև որոշ գերտերությունների (Ռուսաստան, Ֆրանսիա) արտահայտած կշտամբանքը այս հարցի վերաբերյալ Հայաստանի իշխանությունների ցուցաբերած անգործության կապակցությամբ, հաշվի առնելով Ադրբեջանի Հանրապետության կառուցողական կամքի բացակայությունը, և, որ հակառակ պարագան մահացու է հայկական պետականության համար՝ դիմում ենք Հայաստանի Հանրապետության Ազգային ժողովին, ցուցաբերելով կամք և լայնախոհություն, ճանաչել Արցախի Հանրապետությունը:
Պահը այսօր է: Հակառակ պարագայում վաղը ոչ միայն ուշ կարող է լինել, այլ այդ վաղը կարող է այլևս չլինել:
«ՀԱՆՈՒՆ ՀԱԴՐՈՒԹԻ» ՀԿ
«ՎԵՐԱԴԱՐՁ ԴԵՊԻ ԴԻԶԱԿ» ՀԿ
«ՀԱԴՐՈՒԹԻ ԴԵՕԿՈՒՊԱՑԻԱ» ՀԿ
Կաճառ Գիտական կենտրոն
«Շուշի» բռնի տեղահանված հայ ազգաբնակչության ՀԿ
«Ադրբեջանական ԽՍՀ-ից հայերի միավորում» ՀԿ
Ադրբեջանական ԽՍՀ-ից փախստականների համագումար
“MER TUN ARTSAKH” NGO
“FREEDOM FOR ARTSAKH FOUNDATION”
