«Օրրան» բարեգործական կազմակերպությունը հունիսի 1-ին` Երեխաների իրավունքների պաշտպանության օրը հյուրընկալել էր պրոֆեսիոնալ բռնցքամարտի աշխարհի նախկին չեմպիոն Արթուր Աբրահամին:
Նա ոչ միայն համբուրգերներ պատրաստեց երեխաների համար, այլեւ պարեց ու խաղաց նրանց հետ, լուսանկարվեց:
Կարդացեք նաև
Aravot.am-ի հետ զրույցում Արթուր Աբրահամը նշեց, որ շատ ուրախ է մասնակցել նման բարի միջոցառման. «Երջանիկ եմ, որ որպես մարզիկ մասնակցում եմ, ուրախացնում երեխաներին: Նրանք մեր ապագան են, մենք իրենցով ապրում ենք»: Մարզիկն ասաց, որ «Օրրան» շտապուց առաջ նաեւ խաղալիքներ է գնել իր ընտանիքի փոքրիկների համար:
«Օրրանի» հիմնադիր Արմինե Հովհաննիսյանը Aravot.am-ի հետ զրույցում նշեց, որ ավանդույթի համաձայն «Մարիոթ» հյուրանոցը եւ «Օրրանի» մյուս բարեկամները` «Կոկա կոլան», «Բարի Սամարացին», «Տաշիր պիցցան», Երեւանի շոկոլադի գործարանը եւ «Թամարա պաղպաղակը» փորձում են տոն ստեղծել «Օրրանի» շահառու երեխաների համար, ավելի գունեղ դարձնել նրանց օրը, հատկապես որ այժմ «Օրրանի» հարկի տակ հյուրընկալել են փոքրիկների, որոնք Սիրիայից, Լիբանանից, Արցախից են Հայաստան տեղափոխվել: «Իհարկե, այս տարին տարբերվում է նախորդներից, բայց մենք ուզում ենք երեխաներին երջանիկ տեսնել, եւ նրանց երջանկության ճանապարհը սկսել այսօրվանից»,-ասաց Արմինե Հովհաննիսյանը:
Տիկին Հովհաննիսյանից տեղեկացանք, որ Արցախյան երկրորդ պատերազմից հետո «Օրրանը» 8000 արցախցի երեխաների է օգնել. «Մենք ընդլայնել ենք մեր առաքելությունը պատերազմից հետո, որպեսզի կարողանանք նաեւ արցախցի երեխաների օգնել` տրամադրելով սնունդ, քնապարկ, ձմեռային հագուստ եւ անկողին»:
Գոհար ՀԱԿՈԲՅԱՆ
