«Պատիվ ունեմ» դաշինքի մաս կազմած ՀՀԿ խորհրդի անդամ Հովհաննես Սահակյանը խոսել է պատերազմում պարտվելու եւ խորհրդարանական ընտրությունների նախընտրական շրջանի մասին:
«Այն, ինչ այսօր կատարվում է Հայաստանի Հանրապետությունում, որեւէ տրամաբանության, բանականության մեջ չի տեղավորվում: Սկսած հետպատերազմյան ժամանակաշրջանից, երբ կապիտուլյանտը ստորագրեց այդ խայտառակ հաշտության փաստաթուղթը, որը քննարկել էր Ալիեւի հետ եւ որի մասին վերջերս ակնարկեց Վլադիմիր Պուտինը: Դրա շարունակությունն այն ընտրական գործընթացն է, որը այսօր տեղի է ունենում: Այսինքն, խորհրդարանական ընտրությանը մասնակցում է այն մարդը, որը երկիրը հասցրել է կապիտուլյացիոն վիճակի, իսկ այսօր իր թիմով պայքարում է վերընտրվելու համար, փորձում է նաեւ գնահատականներ տալ: Տրամաբանությունից դուրս է այսօր փողոցներում մեքենաներից հնչող բարձր երաժշտությունը, երաժշտական տարբեր միջոցառումներ կազմակերպելը եւ լայվ ցուցադրելը ու էլի նմանատիպ բազմաթիվ բաներ:
Այս ամենը նաեւ բոլորիս ամոթն է: Բոլորիս ամոթն է, որ մինչեւ օրս չունենք մեր հերոս նահատակների, գերեվարված տղաների, անհետ կորածների հստակ թիվ եւ չգիտենք, թե առհասարակ ինչ է կատարվում այսօր: Դրա ապացույցն է, որ տղաների աճյունները, մասունքները մի դիահերձարանից տեղափոխվում են մեկ այլ դիահերձարան: Աշխարհում նման բան ուրիշ ոչ մի տեղ գոյություն չունի: Հայը երբեք չի վախեցել նահատակվելուց, մարտիրոսանալուց, հայը վախեցել է դավաճանության զոհ դառնալուց: Ու մենք բոլորս այլեւս մտածում ենք, թե ինչի տղերքը դավաճանության զոհ դարձան, որ փաստաթուղթը ստորագրվեց գիշերով, որի արդյունքում հողերը տղաների հետ հանձնվեցին ու նրանք մնացին շրջափակման մեջ: Սա խայտառակություն է:
Հիմա այս մարդը, այս քաղաքական ուժը հպարտ է եւ ուղիղ նայում է մարդկանց աչքերի մեջ: Այստեղ իմ կարծիքով հոգեբույժի անհրաժեշտություն կա: Ժողովուրդը այլեւս պետք է հասկանա, որ այս ընտրությունները հող հանձնելու, հող հանձնողի, թուրքի հետ քիրվայություն անողի հետ կապված խնդիր է: Ի՞նչ է նշանակում, որ երկրի ղեկավարը փաստում է, որ թշնամու զինված ուժերի ավելի քան 600 զինվորներ մտել են ինքնիշխան պետության սահմանից ներս ոչ թե ծաղիկ հավաքելու, այլ քեզ ոչնչացնելու, ագրեսիայի նպատակով, ու ոչ մի գործողություն չի ձեռնարկում»,- ասաց Հովհաննես Սահակյանը:
Կարդացեք նաև
Նա նաեւ վստահություն հայտնեց, որ հունիսի 20-ից հետո իշխանության գալու են նոր, ազգային ուժեր: Բայց նաեւ մտահոգություն հայտնեց, որ այս իշխանությունը կարող է քաղաքացիական բախումներ հրահրել:
Աշոտ ՀԱԿՈԲՅԱՆ
