«Որևէ կուսակցության պարագայում չի կայացվել որոշում գրանցումը մերժելու մասին, բոլոր կուսակցությունները՝ 26 սուբյեկտ, որոնք դիմել են գրանցվելու, բոլորի պարագայում գրանցման որոշումները կայացված են»,- Կենտրոնական ընտրական հանձնաժողովի (ԿԸՀ) մայիսի 31-ի արտահերթ նիստում հայտարարեց ԿԸՀ նախագահ Տիգրան Մուկուչյանը:
Արտահերթ նիստի ընթացքում ԿԸՀ-ն քննարկեց հունիսի 20-ին կայանալիք ՀՀ ԱԺ արտահերթ ընտրություններին կուսակցությունների, կուսակցությունների դաշինքների ընտրական ցուցակների գրանցման հարցը:
ԿԸՀ նախագահ Տիգրան Մուկուչյանը տեղեկացրեց, թե ինչ կարգով են որոշելու գրանցել կամ չգրանցել այս կամ այն կուսակցությունը կամ դաշինքը: Նա մանրամասնեց. «Թեկնածուների և կուսակցությունների գրանցման հարցը քննարկելիս, եթե հանձնաժողովի անդամներից որևէ մեկը ունենում է առարկություն, կազմակերպվում է քվեարկություն, և մերժման որոշումը համարվում է ընդունված ձայների 2/3-ով: Առարկության բացակայության դեպքում որոշումն ընդունվում է առանց քվեարկության»:
ԿԸՀ-ն մերժեց «Արդար Հայաստան»-ի ընտրական ցուցակում ներգրավված Դավիթ Գրիգորյանի, «Բարգավաճ Հայաստան»-ի Արսեն Փալանուզյանի, «Հայոց Հայրենիք»-ի Արա Թանգինովի, «Ազգային օրակարգ»-ից Արմեն Մարտիրոսյանի, «Հայաստանի Եվրոպական» կուսակցության ցուցակից Հայկարամ Մինասյանի, «Ազատ Հայրենիք» դաշինքից Նաիրա Հովհաննիսյանի, Ալիսա Տիտանյանի, «Ազգային-ժողովրդավարական բևեռ»-ից 4 թեկնածուների, «Միասնական Հայրենիք»-ի 2 թեկնածուների, «Ազատություն» կուսակցությունից 3 թեկնածուների. «Շիրինյան- Բաբաջանյան ժողովրդավարների դաշինք»-ից Ռոբերտ Ղևոնդյանի գրանցումը:
Կարդացեք նաև
Ներկայացված չէին նրանց հայերենի իմացությունը հավաստող և այլ փաստաթղթեր:
ԿԸՀ-ն մերժեց նաև «Զարթոնք» ազգային քրիստոնեական կուսակցության ցուցակում ներառված մի շարք թեկնածուների թեկնածությունները: Նրանց թվում է կուսակցության ընտրական ցուցակի 2-րդ համարը զբաղեցնող Վահագն Չախալյանը: Կուսակցության լիազոր ներկայացուցիչը տեղեկացրեց՝ ոստիկանությունը հրաժարվել է նրան փաստաթղթեր տրամադրել ՝ պատճառաբանելով իր կասկածներով և պնդեց՝ ըստ էության ոստիկանությունը Վահագն Չախալյանին զրկել է իր՝ ընտրելու իրավունքն իրացնելու հնարավորությունից: Տիգրան Մուկուչյանը հայտնեց՝ դատարանի որոշմամբ՝ ոստիկանության որոշումը մնացել է ուժի մեջ: ԿԸՀ-ն մերժեց նաև Հայաստանի դեմոկրատական կուսակցության թեկնածու Հրանտ Կարապետյանի գրանցումը:
Տաթև ՀԱՐՈՒԹՅՈՒՆՅԱՆ
