«Եթե կողմերն առաջարկն ընդունեն, սահմանի վրա լարվածությունը կթուլանա։ Չեմ տեսել, որ այս պահին որեւէ երկիր պատրաստ լինի դիտորդներ տեղակայել։ Ադրբեջանից էլ արձագանք չեմ տեսել»,-լրագրողների հետ ճեպազրույցում այսօր անդրադառնալով վարչապետի պաշտոնակատար Նիկոլ Փաշինյանի՝ Սոթքից Խոզնավար ընկած հատվածի շփման գծում միջազգային դիտորդներ տեղակայելու առաջարկին՝ ասաց «Լուսավոր Հայաստան» խմբակցության ղեկավար Էդմոն Մարուքյանը։
Նա ասաց՝ չգիտի, թե ինչպես է այդ առաջարկը ծնվել․ «Աշխարհագրագետների հետ քննարկվել է, թե ոչ, չգիտեմ։ Զորքերի հայելային հետքաշում ասելով նկատի ունեն, որ բոլորիս հայտնի սահմանից զորքերը հետ պետք է քաշվեն, տեղակայվեն դիտորդներ։ Գորիսի հատվածում, օրինակ, սահմանապահներ են, ոչ թե ԶՈՒ-եր, այդ թվում՝ ՌԴ ներկայացուցիչներ։ Այսինքն, մենք արդեն մեկ նման օրինակ ունենք։ Առաջարկը ոչ թե խնդրի լուծման մասին է, այլ լարվածությունը թուլացնելու»,-շեշտեց Էդմոն Մարուքյանը։
Ըստ նրա․ «Խնդրի լուծումը կլինի, երբ սահմանները ճանաչվեն։ Սրանով խնդիրը չի լուծվում։ Գալու են դիտորդները կանգնեն, որ իրար վրա չկրակեն, իրար չգերեվարեն, մինչեւ որ կորոշվի, թե սահմանի գիծը որտեղով է անցնում։ Մի քանի օր է անցել, բայց արձագանք չկա»։
Կարդացեք նաև
Ինչ վերաբերում է Ադրբեջանի նախագահ Իլհամ Ալիեւի երեկվա հայտարարությանն այն մասին, թե «Զանգեզուրի միջանցքի» առնչությամբ կա առաջընթաց, Մարուքյանը շեշտեց․ «ՀՀ տարածքով ոչ մի միջանցք չպետք է տրվի։ Եթե խոսքը ապաշրջափակման մասին է, ապա պետք է խոսել այդ մասին, սահմաններն ուշ թե շուտ պետք է բացվեն։ Մնացածը ճշտեք իշխանություններից»։
Փաշինյանի՝ սահմանազատման-սահմանագծման մասին փաստաթուղթ ստորագրելու պատրաստակամության վերաբերյալ էլ ԼԿՀ ղեկավարն ասաց․ «Վաղ թե ուշ պետք է լինի նման հանձնաժողով, այլ բան է, թե ինչ ձեւաչափով եւ արդյոք ենթակա՞ են լինելու դրա որոշումները ՍԴ-ի վավերացմանը»։
Լուիզա ՍՈՒՔԻԱՍՅԱՆ
