Բրնձով եւ կաթով պատրաստված աղանդերը շատ հայտնի է ինչպես հնդկական, թայլանդական, թուրքական, Հավայան կղզիների եւ այլ երկրների խոհանոցներից, այնպես էլ՝ եվրոպական երկրների խոհանոցներում է բավականին տարածված: Ընդ որում, այն համարվում է շատ հեշտ, մատչելի, ընդհանուր առմամբ՝ շատ համեստ աղանդեր, որ իրենց կարող են թույլ տալ բոլորը:
Այսօր առաջարկում եմ մի փոքր «ճոխացրած» տարբերակով բրնձե պուդինգ, որտեղ բացի բրնձից եւ կաթից, կան նաեւ կակաչի սերմեր, նուշի փաթիլներ…
Անհրաժեշտ մթերքները
Բրինձ- կես բաժակ
Կարդացեք նաև
Կաթ- 2,5 բաժակ
Շաքարավազ-1 բաժակ
Կակաչի սերմ- 1 ճաշի գդալ
Կաթնասեր՝ բարձր յուղայնությամբ- 3 ճաշի գդալ
Վանիլի եւ դարչինի մեկական ձողիկ
Պատրաստման եղանակը
Նախընտրելի է վերցնել իտալական կամ ճապոնական սորտերի կլոր բրինձ, որոնցով պատրաստում են սուշի եւ ռիզոտո: Օրինակ, երեւանյան սուպերմարկետներում կարելի է գտնել «արբորիո» տեսակի բրինձը, որից հրաշալի պուդինգ է ստացվում: Ճապոնական եւ իտալական այդ տեսակի բրինձները պարունակում են մեծ քանակի ամիլոպեկտին, որի շնորհիվ բրինձն է՛լ ավելի կրեմային նուրբ համ եւ մածուցիկություն ունի: Եթե չունեք այդ բրինձներից, վերցրեք սովորական կլոր բրինձ: Թեեւ որոշ պուդինգների բաղադրատոմսերում, օրինակ, նախընտրում են երկար եւ կրեմայնություն գրեթե չունեցող բասմատին:
Սովորաբար բրնձով պուդինի պարագայում չափաբաժինը հետեւյալն է՝ 1 բաժին բրինձ, 2 բաժին շաքարավազ եւ 5 բաժին կաթ: Տվյալ դեպքում ՝ կես բաժակ բրինձ, 1 բաժակ շաքարավազ եւ 2,5 բաժակ կաթ:
Կաթն ու շաքարավազը դրեք կրակին: Եթե ունեք վանիլի եւ դարչինի ձողիկներ, դրանք էլ դրեք կաթի մեջ: Եթե չունեք եւ պետք է օգտագործեք դարչինի եւ վանիլի փոշի, ապա դրանք կավելացնեք վերջում, երբ պուդինգը գրեթե պատրաստ լինի:
Երբ կաթը եռա, հանեք վանիլի եւ դարչինի ձողիկները, լցրեք բրինձը եւ կրակը իջեցրեք, դարձրեք հնարավորինս մարմանդ: Ավելացրեք նաեւ կակաչի սերմերը: Պետք է եփվի գրեթե մեկ ժամ, մինչեւ զանգվածը բավականաչափ պնդանա: Հարկավոր է պարբերաբար, 5 րոպեն մեկ խառնել փայտե գդալով: Այն պահին, երբ գդալի հետեւի մասում մատով գիծ քաշեք եւ այդ տեղը մնա, այսինքն՝ կաթնային զանգվածը բավականաչափ խիտ լինի, ուրեմն պատրաստ է: Եթե ուզում եք պուդինգը բավականաչափ կրեմային լինի, ավելացրեք նաեւ կաթնասերը, թողեք եփվի եւս 15-20 րոպե:
Լցրեք աղանդերի ամանների մեջ, վրան լցրեք նուշի փաթիլները եւ դրեք սառնարան: Մոտ 2-3 ժամից պուդինգը պատրաստ է մատուցման համար:
Բարի ախորժակ:
Մանրամասները՝ տեսանյութում:
Պատրաստեց Մելանյա ԲԱՐՍԵՂՅԱՆԸ
