Այսօր «Հայաստան» դաշինքը ներկայացրեց «365 օր. Ապագան սկսվում է հիմա» նախընտրական ծրագիրը: Արմեն Գեւորգյանն ասաց, որ պատրաստ են ստանալ առաջարկներ, դիտողություններ:
Այն կարող է վերափոխվել ու դառնալ կառավարության գործունեության իրատեսական ծրագիր. «Մեր երկրի ամենամեծ կապիտալը մարդն է»,- ասաց նա՝ վստահեցնելով, որ դա միայն կարգախոս չէ. «Վերջին երեք տարում ամենամեծ տապալումը տեղի է ունեցել հենց այդ հարցում՝ մարդու՝ որպես ամենամեծ կապիտալի արժեզրկումը»:
Թվարկելով սկզբունքները՝ Արմեն Գեւորգյանն ասաց. «Պետության ներսում պետք է գերիշխի արդարությունը: Պետք է բացառել անպատժելիությունը, ընտրովի արդարադատությունը եւ պոպուլիզմը: Հանուն ճշմարտության պետք է ասել, որ դրանց որոշ դրսեւորումներ ունեն 30-ամյա պատմություն, բայց դրանք պետք է մնան անցյալում»:
Ծրագիրն իրագործելու համար դաշինքը խոստանում է վերափոխել միջավայրը, մարդկանց վարակել աշխատանքով, հանել այն ներվը, լարվածությունը, որն այսօր առկա է յուրաքանչյուր բակում, յուրաքանչյուրի տանը. «Մենք պետք է ունենանք այնպիսի Հայաստան, որ քաղաքացիների համար ապրելու երկիր է, հյուրերի համար՝ հյուրընկալ»:
Կարդացեք նաև
Հռիփսիմե ՋԵԲԵՋՅԱՆ
