«Տեղի ունեցածը ագրեսիայի ակտ է՝ ընդդեմ ՀՀ-ի: Ի՞նչ է արել ՀՀ-ն վերջին 30 տարվա ընթացքում՝ կուտակված իրավապայմանգրային բազան, որը ունենք ՌԴ-ի հետ երկկողմ ձեւաչափում ու ՀԱՊԿ-ի մեր անդամակցության շրջանակներում, դարակներից հանել է ու դրել շրջանառության մեջ: Բայց դա խիստ անբավարար է, որովհետեւ սահմանային ճգնաժամը չի լուծվել»,- այսօր «Սահմանային իրավիճակների լուծման հեռանկարները» թեմայով հանրային քննարկման ժամանակ այսպիսի տեսակետ հայտնեց «Շիրինյան-Բաբաջանյան» դաշինքի թեկնածու Ռուբեն Մեհրաբյանը:
Նա նշեց, որ պաշտոնական Փարիզի ու Վաշինգտոնի դիրքորոշումն այն է, որ Մինսկի խմբի եռանախագահության ձեւաչափով պետք է բանակցությունները շուտափույթ վերսկսեն ու այդ ընթացքում լուծվի ԼՂ կարգավորման հարցը. «Հայաստանը պետք է հայտարարի, որ հենց այսօր պատրաստ է վերսկսել բանակցությունները՝ գնդակը գցելով ՌԴ-ի ու Ադրբեջանի դաշտը: Ալիեւը երբեք այս աստիճան չէր լկտիանա, եթե վստահ չլիներ, որ ՀԱՊԿ-ը հենց այսպես է արձագանքելու, եւ եթե նա առնվազն չխանգարելու երաշխիքներ չունենար ՌԴ-ում: Ես բացառում եմ»:
Հռիփսիմե ՋԵԲԵՋՅԱՆ
