«Ասում են՝ սա մեր ռազմավարական դաշնակիցն է: Քո ռազմավարական դաշնակիցը Թուրքիայի հետ պայմանագիր ունի քեզ մասնատելու, քեզ գերելու: Հայ ժողովրդի միասնական ջանքերով մենք 91-ին այդ խուժանանոցից դուրս եկանք՝ ճիշտ մտածող մարդկանց ներդրմամբ»,-այսօր «Սահմանային իրավիճակների լուծման հեռանկարները» թեմայով հանրային քննարկման ժամանակ ասաց ԱԻՄ առաջնորդ Պարույր Հայրիկյանը:
Նա ասաց, որ մարդիկ չէին հասկանում, որ Արցախը կորցնելու մեղավորը նա է, ում հետ հույս են կապում. «Հայաստանը պիտի միջազգային իրավունքի բոլոր հնարավորություններն օգտագործի: Ստալինը սահման է գծել, եւ մենք այդ սահմաններում բանակցություն ենք վարում, ասում ենք՝ լավ, սիրելի Ստալինի գծած սահմաններին մենք համաձայն ենք»:
Ըստ Հայրիկյանի, հարեւանների, համաշխարհային հանրության հետ խոսելիս պետք է մշտապես պահել արժանապատվությունը, ոչ թե ստորաքարշությամբ փորձել համակրանքի արժանանալ. «Տեսեք ընդդիմության դաշտում ինչով են առաջնորդվում՝ այնպիսի մարդու գտնենք, որ Ռուսաստանում ավելի լավ «սապոնվի»: Պիտի հակառակը լիներ, ՌԴ-ի հետ խոսում ենք՝ որպես բարեկամ՝ «գիտեք, մենք ձեզ հետ հույսեր էինք կապում, չեք կարողանում, երեւի խնդիրներ ունեք, շատ բարի, մենք այլ ելք ենք փնտրում: Հրապարակային պիտի խոսվի սրա մասին: Բայց սրանք՝ սկսած Լեւոնից մինչեւ Նիկոլ Փաշինյան, շողոքորթելու արվեստին պիտի տիրապետեն»:
Խոսելով ՀԱՊԿ-ի մասին՝ Հայրիկյանն ասաց. «ՀԱՊԿ չկա, կա ՌԴ: Կա այն ՌԴ-ն, որը Թուրքիայի հետ պայմանագիր է կնքել, հայերի հերն անիծել, պայմանագրին հավատարիմ է ու Հայաստանի այսօրվա սահմանները դրա հետեւանքներն են: Այնպես որ, ՀԱՊԿ-ի մասին խոսելիս պետք է հստակ ասենք՝ ռուսներ, ձեզ շատ ենք սիրում, բայց ափսոս, դուք ուրիշ բաներ եք սիրում, բացի արդարությունից: Ձեզ պես դաշնակից մեզ պետք չի»:
Կարդացեք նաև
Հռիփսիմե ՋԵԲԵՋՅԱՆ
