Ինչպես տեղեկացրել ենք, հունիսի 20-ի արտահերթ ընտրություններին մասնակցելու հայտ ներկայացրած մի քանի քաղաքական ուժեր պատգամավորների գրանցման փաստաթղթերում թերություններ են ունեցել ու այսօր նիստում ԿԸՀ-ն 48 ժամ տվեց՝ դրանք վերացնելու համար:
Մասնավորապես, թերություններ եղել են «Պատիվ ունեմ» դաշինքի, «Շիրինյան-Բաբաջանյան» ժողովրդավարների դաշինքի, «Հանրապետություն», «Արդար Հայաստան», «Բարգավաճ Հայաստան», «Հայոց հայրենիք», «Ազգային օրակարգ», «Հայաստանի եվրոպական կուսակցության, «Քաղաքացու որոշում», «Ազգային-ժողովրդավարական բեւեռ», «Միասնական հայրենիք», «Լուսավոր Հայաստան», «Ազատություն», «Հայ ազգային կոնգրես», «Ինքնիշխան Հայաստան», «Զարթոնք», ՀԴԿ կուսակցությունների փաստաթղթերում:
«Շիրինյան-Բաբաջանյան» ժողովրդավարների դաշինքի 19-րդ համարը չի ներկայացրել անձը հաստատող փաստաթղթի պատճենը:
«Արդար Հայաստան» կուսակցության 13-րդ համարի թեկնածու Դավիթ Ալեքսանդրի Գրիգորյանը չի բերել հայերենին տիրապետելու հանգամանքը հավաստող փաստաթուղթ: Ավելի ճիշտ, ատեստատ է բերել՝ Դավիթ Ալեքսանդրի Ստեփանյանի անուն ազգանունով:
Կարդացեք նաև
«Բարգավաճ Հայաստան կուսակցության» 89-րդ համարը՝ փաստաթղթերում Արսեն Փալանդուզյանը նույնպես չի ներկայացրել հայերենին տիրապետելու մասին փաստաթուղթ:
«Հայոց հայրենիք» կուսակցության 90-րդ համարի թեկնածուն, ինչպես նաեւ «Ազգային օրակարգ» կուսակցության ցուցակում 55 հորիզոնականում Արմեն Մարտիրոսյանը նույնպես չեն ներկայացրել հայերենին տիրապետելու փաստաթուղթ:
«Քաղաքացու որոշում» կուսակցության թեկնածուներից մեկը չի բերել անձը հաստատող փաստաթղթի պատճենը:
«Ազգային-ժողովրդավարական բեւեռի» ընտրացուցակում ընդգրկված 3 թեկնածու չեն ներկայացրել վերջին 4 տարում միայն ՀՀ քաղաքացի հանդիսանալու, ՀՀ-ում մշտապես բնակվելու, հայերենին տիրապետելու հանգամանքն ապացուցող փաստաթղթեր: Նույն փաստաթղթերի բացակայություն կար նաեւ «Լուսավոր Հայաստան» կուսակցության փաթեթում:
Ըստ Ընտրական օրենսգրքի, ընտրացուցակներում յուրաքանչյուր սեռի ներկայացուցիչների թիվը չպետք է գերազանցի 70%-ը, բացի այդ, այդ կուսակցության անդամ չհանդիսացող անձանց թիվը չի կարող գերազանցել ընտրացուցակի 30%-ը, բայց «Ազատություն» կուսակցության ցուցակում սա պահպանված չէ, թվով 75 անկուսակցական թեկնածու է ընդգրկվել: Ուստի ԿԸՀ-ն 48 ժամ ժամանակ տվեց՝ այդ թերությունները վերացնել, եթե դրանք բացառապես տեխնիկական թերություն են: Բացի այդ, այս կուսակցության որոշ թեկնածուներ չեն ներկայացրել վերջին 4 տարում ՀՀ-ում մշտապես բնակվելու, վերջին 4 տարում միայն ՀՀ քաղաքացի հանդիսանալու տեղեկանքը:
«Հայ ազգային կոնգրեսի» թեկնածուներից մեկը հայերենի իմացությունն ապացուցող փաստաթուղթ չի բերել, մեկն էլ չի բերել ՀՀ քաղաքացի հանդիսանալու տեղեկանքը:
«Զարթոնքից» 14 թեկնածու փաստաթղթերում բացթողումներ ունեին:
ՀԴԿ կուսակցության ցուցակում 48 թեկնածու անկուսակցական է, 14 թեկնածուի դեպքում որեւէ բան նշված չէ: ԿԸՀ-ն հորդորեց, որ եթե վրիպակի արդյունք է, ապացույցներ բերեն: Բացի այդ, Արմեն Արզաքանցյանը եւ մի շարք այլ թեկնածուներ չեն բերել հայերենին տիրապետելու փաստաթուղթը:
ԿԸՀ նախագահ Տիգրան Մուկուչյանը զգուշացրեց, որ «Ազատությունը» եւ ՀԴԿ-ն պետք է կարողանան ապացուցել, որ հայտնաբերված թերությունները մեխանիկական են:
Հռիփսիմե ՋԵԲԵՋՅԱՆ
