Ամբաստանյալ Արմեն Մնացականյանը դատաքննության ժամանակ պատասխանելով դատավարության կողմերի հարցերին՝ հայտնել էր, որ 2020 թվականի հունվարի 1-ին եղել է իրենց տանը, ժամը 7:30-ի սահմաններում տնից դուրս է եկել: Հունվարի 1-ին հանդիպել էր տուժող Ռոբերտ Փափազյանին:
Տուժող Ռոբերտ Փափազյանը ցուցմունք էր տվել, որ դեպքի օրը գնացել էր իր մորաքրոջ տուն՝ Նոր տարին շնորհավորելու, տաքսի էր կանչել, դուրս է եկել, որ նստի տաքսի: Ամբաստանյալի հետ միմյանց շնորհավորել են, չի հիշում կոնկրետ ինչպես «հրմշտոց» է սկսվել, հայտնվել է հիվանդանոցում, չի էլ հիշում, թե ինչպես է հիվանդանոց գնացել: Հրմշտոցից հետո իրեն ամբաստանյալը, երեւի, հարվածել է, ինքն ընկել է: Կոնկրետ չի հիշում, դրա համար չի կարող ասել: Մեղադրանքի կողմի համաձայն, Արմեն Մնացականյանը 2020 թվականի հունվարի 1-ին, ժամը 20:30-ի սահմաններում, Սարի Թաղի 3-րդ շարքի 1-ին տան դիմաց վիճաբանել է Ռոբերտ Փափազյանի հետ, որի ժամանակ ձեռքով հարվածել է վերջինիս դեմքի շրջանին, ինչից Ռոբերտ Փափազյանը ընկել է նույն հատվածում գտնվող մեքենաների թափոնների վրա, որից հետո իր մոտ եղած դանակով հարվածներ է հասցրել նրա մարմնի տարբեր հատվածներին` որովայնի, լյարդի եւ ստամոքսի վնասումներ, դեմքի ձախ կեսի, պարանոցի, ձախ ուսահոդի կտրած-ծակած վերքեր, տուժողի առողջությանը դիտավորությամբ պատճառելով ծանր վնաս` կյանքին վտանգ սպառնացող:
Վերաքննիչ քրեական դատարանում մայիսի 26-ին դատավոր Մհեր Արղամանյանի նախագահությամբ շարունակվեց տուժողի ներկայացուցչի բողոքի քննությունը: Այն կներկայացնենք «Առավոտի» առաջիկա համարում, պահանջը մեկն է. բեկանել Երեւան քաղաքի ընդհանուր իրավասության դատարանի դատավճիռը եւ ամբաստանյալի նկատմամբ հոդվածի սանկցիայի սահմաններում նշանակել պատիժ` առանց ՀՀ քրեական օրենսգրքի 70-րդ հոդվածի կիրառման:
Երեւան քաղաքի դատավոր Վ. Մելիքյանի դատավճռով՝ Արմեն Մնացականյանը մեղավոր է ճանաչվել ՀՀ քրեական օրենսգրքի 112-րդ հոդվածի 1-ին մասով եւ դատապարտվել ազատազրկման 3 տարի ժամկետով: ՀՀ քրեական օրենսգրքի 70-րդ հոդվածի հիման վրա նշանակված ազատազրկման ձեւով պատիժը պայմանականորեն չկիրառել՝ սահմանելով փորձաշրջան 2 տարի ժամկետով՝ Արմեն Մնացականյանին պարտավորեցնելով չփոխել բնակության վայրը:
Կարդացեք նաև
Արմեն Մնացականյանի նկատմամբ ընտրված ստորագրություն չհեռանալու մասին խափանման միջոցը թողնվել է անփոփող մինչեւ դատավճռի օրինական ուժի մեջ մտնելը:
Ռուզան ՄԻՆԱՍՅԱՆ
«Առավոտ» օրաթերթ
28.05.2021
