«Իհարկե, ոտքի ենք կանգնելու»,-Սարդարապատի հուշահամալիրում լրագրողների հետ ճեպազրույցում այսօր արձագանքելով հարցին, որ եթե ՀՀ-ի եւ Ադրբեջանի միջեւ սահմանազատման գործընթացում որոշվի Տավուշի մի քանի գյուղերն ու Արարատի մարզի մեկ գյուղը հանձնել Ադրբեջանին, ոտքի՞ ենք կանգնելու՝ ասաց ԱԺ պատգամավոր, «Քաղաքացիական պայմանագիր» կուսակցության նախընտրական ցուցակում ընդգրկված Սերգեյ Բագրատյանը։
Լրագրողները հետաքրրքվեցին, թե իր գնահատմամբ՝ ՀՀ-ում ունե՞նք ադրբեջանական բնակավայրեր։ Բագրատյանը պատասխանեց․ «Եթե վերադառնանք դեպի պատմության ընթացք, այս ամբողջ տարածքը եւ Թուրքիայի տարածքի մեծ մասը հայկական պետականության տարածքներ են։ Այսինքն, մենք մինչեւ ո՞ւր ենք գնում։ Եթե ինչ-որ ժամանակ խորհրդային տարիներին մի հինգ գյուղ եղել է ադրբեջանաբնակ, ապա մենք ունեցել ենք հայաբնակ Գանձակ։ Գանձակն ամբողջությամբ պետք է վերադարձնեն մե՞զ․․․Գանձակը վերադարձնեն, մենք էլ հինգ գյուղ վերադարձնենք։ Մենք պետք է պահանջենք»։
Լրագրողները հիշեցրին, որ ըստ Նիկոլ Փաշինյանի քավոր, պատգամավոր Վահե Ղալումյանի՝ Տավուշում կան ադրբեջանական հողեր, որոնք, նրա ձեւակերպմամբ, անմարդաբնակ, ամայի տարածքներ են։ «Ես էլ ասում եմ, որ Գանձակը բուն հայկական տարածք է։ Իսկ այդ գյուղերն այսօր էլ հայկական գյուղեր են եւ երբեւէ չեն կարող լինել ադրբեջանական»։
Լուիզա ՍՈՒՔԻԱՍՅԱՆ
