Արցախի Հանրապետության Ազգային ժողովի նախագահ Արթուր Թովմասյանը Հայաստանի առաջին հանրապետության օրվա առթիվ հանդես է եկել միասնականության կոչով
Մայիսի 28-ը Հայաստանի առաջին հանրապետության օրն է:
1918 թվականի մայիսի 28-ին Հայոց ազգային խորհուրդը հայտարարեց անկախ Հայաստանի Հանրապետության ստեղծման մասին: Այն ընդամենը երկու տարվա կյանք ունեցավ՝ մինչև 1920 թվականի դեկտեմբերի 2-ը, երբ 11-րդ Կարմիր բանակի զորամասերի մուտք գործելուց հետո հանրապետությունը խորհրդայնացվեց:
Այսօր, երբ հայոց պետականությունը կրկին վտանգված է, էլ ավելի է արժևորվում առաջին հանրապետության օրը: Հիշենք, որ հեռավոր 1918-ին ևս շատ դժվար իրավիճակում է ծնվել Հայաստանի առաջին հանրապետությունը: Սարդարապատում հաղթելով թուրքական բանակին՝ հայկական զորքերը կարողացան կասեցնել թուրքական ներխուժումն Անդրկովկաս և փրկել Հայաստանը լիակատար ոչնչացումից:
Կարդացեք նաև
Վերհիշելով պատմական այդ օրերը՝ միավորվենք, ուժ ստանանք նախնիների հերոսական կեցվածքից: Հայապահպանությունն առանց հայկական պետականության անհնար է:
Այսօր Հայաստանի Հանրապետությունը ողջ հայության միասնական աջակցության, միահամուռ կամքի կարիքն ունի: Կիսատված Արցախն իր թիկունքին պիտի ունենա ուժեղ, միակամ Հայաստանի Հանրապետություն և Սփյուռք:
ԱՀ ԱԺ լրատվության և հանրության հետ կապերի բաժին
