Արտաքին գործերի նախարար Ալեքսանդր Շալլենբերգը երեկ Վիեննայում հանդիպել է իր ադրբեջանցի գործընկեր Ջեյհուն Բայրամովին: Հանդիպման հիմնական թեման Լեռնային Ղարաբաղում և դրա շուրջ հակամարտությունն էր, ինչպես նաև երկկողմ հարցերը, այդ թվում՝ տնտեսական համագործակցությունը: Արտաքին գործերի նախարար Շալլենբերգը երեքշաբթի օրը հեռախոսազրույց էր ունեցել իր հայ գործընկեր Արա Այվազյանի հետ:
Ալեքսանդր Շալլենբերգը մտահոգություն հայտնեց Լեռնային Ղարաբաղի տարածաշրջանում առկա լարվածության կապակցությամբ և կոչ արեց կողմերին զսպվածություն պահպանել:
«Վտանգավոր մոլորություն կլինի հավատալ, որ հակամարտությունը լուծված է միայն այն պատճառով, որ զենքերը հիմա լուռ են: Այն շարունակում է եռալ մակերեսի տակ: Բոլորին կոչ է արվում չձեռնարկել որևէ գործողություն, որը կարող է հանգեցնել նոր սրացման»,- կոչ արեց Շալլենբերգը:
ԱԳ նախարար Շալլենբերգը տևական հակամարտությունը դադարեցնելու ամենակարևոր նախադրյալներն է համարում մարդասիրական միջոցառումները և հակամարտության քաղաքական լուծմանն ուղղված երկու կողմերի պատրաստակամությունը: ԵՄ-ի աջակցությամբ ԵԱՀԿ Մինսկի խմբի համանախագահները (Ֆրանսիա, Ռուսաստան և ԱՄՆ) պետք է զգալի ներդրում ունենան այդ հարցում:
Կարդացեք նաև
«Մեզ շտապ անհրաժեշտ են արագ և պրագմատիկ լուծումներ մարդասիրական այնպիսի հարցերում, ինչպիսիք են բոլոր ռազմագերիների ազատումը և ականազերծումը: Դրա համար մեզ անհրաժեշտ է քաղաքական կամք հակամարտության կարգավորման նպատակով երկխոսության գործընթացը վերսկսելու համար: Մեր կարծիքով, այստեղ առաջատար դեր պետք է ունենան ԵԱՀԿ Մինսկի խմբի համանախագահները: Անցյալ տարվա նոյեմբերի զինադադարը միայն առաջին քայլն էր», -ասաց արտգործնախարար Շալլենբերգը:
Նա նաև շեշտեց տարածաշրջանում եվրոպական հանձնառության կարևորությունը և Ադրբեջանի իր գործընկերոջը վստահեցրեց Ավստրիայի և Եվրոպայի լիակատար աջակցությունը հակամարտության կարգավորման բանակցություններին:
Անցյալ տարի աշնանը տեղի ունեցած զարգացումները ցույց տվեցին, որ ենթադրաբար սառեցված հակամարտությունները կարող են արագորեն կրկին թեժանալ: Մենք ունենք մի շարք տեղական, տարածաշրջանային և աշխարհաքաղաքական «խզվածքներ» արևելյան հարևանության տարածքում: ԵՄ-ն պետք է հավատարիմ մնա և ցույց տա իր ներկայությունն այստեղ: Մեր շահերից չի բխում, որ մենք գործողության դաշտը թողնենք տարածաշրջանային այլ դերակատարներին,- եզրափակեց արտգործնախարարը:
