«Իրավիճակը սահմանի այդ հատվածում շարունակում է նույնը մնալ, իհարկե կա լարվածություն, որովհետեւ մայիսի 12-ից սկսած գիտեք, որ Կութ եւ Վերին Շորժա բնակավայրերի հարակից հատվածներում մենք ունենք Ադրբեջանի բանակի ներկայացուցիչներ մեր սուվերեն տարածքում»,-կառավարության նիստից հետո լրագրողների հետ զրույցում այսօր ասաց Գեղարքունիքի մարզպետ Գնել Սանոսյանը:
Հարցին՝ ինչո՞ւ հայկական կողմը հենց սկզբից գերի չվերցրեց ադրբեջանցի զինծառայողներին ու համարժեք պատասխան չտվեց, արդյոք կա՞ հրաման, որ որեւէ ադրբեջանցի գերի չվերցնեն, Գնել Սանոսյանը պատասխանեց, որ չի կարող այդ հարցին պատասխանել, քանի որ այդ հարցերով զբաղվում են ՊՆ-ն եւ Գլխավոր շտաբը: Դիտարկմանը՝ բայց մարզպետն էլ պատասխանատու է մարզի համար, պարոն Սանոսյանը պատասխանեց՝ այո, պատասխանատու եմ. «Եվ կամավորները, եւ համայնքի ղեկավարները ընդամենն աջակցում են ՊՆ-ի գործողություններին: Ոչ մի տեղ համայնքի ղեկավարը գլխավոր բանակցող չի հանդիսանում: Կարող է այնպես լինել, որ մեր ԶՈՒ գործընկերների հետ որեւէ համայնքի ղեկավար մասնակցի, ներկա լինի, բայց գլխավոր բանակցողը նրանք են»:
Մարզպետի կարծիքով, մինչեւ այս պահը դիվանագիտական աշխատանքն արդյունք չի տվել, քանի որ մինչ օրս Ադրբեջանի զինված ուժերի զինծառայողները գտնվում են Հայաստանի ինքնիշխան տարածքում:
Նրա խոսքով, գնալով վիճակը կարող է ավելի լարվել, որովհետեւ իրավիճակը անընդհատ չի կարող այսպես շարունակվել: «Մարդիկ են, զինվորներ են, նյարդեր են, անընդհատ կարող է ինչ-որ միջադեպ տեղի ունենալ, որը կարող է անկանխատեսելի հետեւանքների բերել: Դրա համար մեր կոչը, հորդորը եւ մեր կողմից արվող աշխատանքը հետեւյալն է, որ ժամ առաջ դիվանագիտական ճանապարհով խնդիրը լուծվի»,-ասաց նա:
Կարդացեք նաև
Մարզպետն ասաց, որ տեղյակ չէ Գեղարքունիքի սահմանին հնչած կրակոցների լուրերի մասին, քանի որ վերջին 1-1,5 ժամվա ընթացքում եղել է կառավարության նիստում:
Լուսինե ԲՈՒԴԱՂՅԱՆ
