«Շատ կուզեի, որ Նիկոլ Փաշինյանը չգա ԱԺ։ Առաջարկել եմ նրան չհրավիրել, որովհետեւ նա ցանկացած հարթակ օգտագործելու է՝ խոսելու համար ամեն ինչից, բացի բուն խնդրից։ Պետք է գան այս իրավիճակի պատասխանատուները՝ պաշտպանության նախարարը, ԳՇ պետը, բայց ոչ Նիկոլ Փաշինյանը»,-խորհրդարանում լրագրողների հետ ճեպազրույցում այսօր ասաց «Բարգավաճ Հայաստան» խմբակցության պատգամավոր Նաիրա Զոհրաբյանը։
Հիշեցնենք, որ Գեղարքունիքի մարզի սահմանային հատվածում ադրբեջանական ԶՈւ զինծառայողների կողմից շրջափակվել եւ գերեվարվել է ՀՀ ԶՈւ 6 զինծառայող, ԱԺ անկախ պատգամավորներն էլ արտահերթ նիստ հրավիրելու գործընթաց են սկսել։
Ինչ վերաբերում է փաստին, որ երեկ վարչապետի պաշտոնակատար Նիկոլ Փաշինյանն իրավիճակի վերաբերյալ ակնարկներ էր արել ՀԱՊԿ-ին ուղղված, Նաիրա Զոհրաբյանը նշեց․ «Դա Նիկոլի ձեռագիրն է։ Բոլորը մեղավոր են, իրենից բացի։ Նա չի կարողանում զինվորի անվտանգության խնդիրը լուծել, եւ օր առաջ պետք է հեռանա։ Չգիտեմ, թե նա ինչ է ուզում ՌԴ-ից կամ ՀԱՊԿ-ից։ Մի բան կարող եմ գնահատել, որ սահմանների անվտանգությունն ապահովել չկարողացող ու բոլորից կառչող իշխանությունը րոպե առաջ պետք է հեռանա։ Ընդդիմադիր քաղաքական ուժեր, դուք ինչո՞ւ եք լռում։ Վաղը կարող է ուշ լինել, եւ ձեր «բուկլետը» կարող է էլ պետք չլինել։ Ընդդիմությունը հիմա պետք է լիներ փողոցում, ժողովրդին հավաքեր ու Նիկոլին պարտադրեր հեռանալ։ Ընդդիմության՝ բուկլետ տպելու փուլն ինձ համար անհասկանալի է»։
Լուիզա ՍՈՒՔԻԱՍՅԱՆ
Կարդացեք նաև
Լուսանկարը՝ արխիվային
