ԱԺ-ում քննարկվում է Հեռուստատեսության եւ ռադիոյի հանձնաժողովի 2020-ի տարեկան գործունեության մասին հաղորդումը:
Պատգամավոր Թագուհի Թովմասյանը հանձնաժողովի նախագահ Տիգրան Հակոբյանին հարցրեց՝ ինչո՞ւ չի հաջողվում գոնե Հանրային հեռուստաընկերության մասով նախկին ավանդույթները փոխել. «Օրինակ, կան մարդիկ, որոնք սիրելի են իշխանությունների համար, Հանրային հեռուստաընկերությունը օրումեջ եթեր է տալիս, կան ատելի կամ սեւ ցուցակում գտնվող մարդիկ, որոնք երբեք չեն լուսաբանվում»: Որպես օրինակ, Թովմասյանը հիշեցրեց, որ երբ իրենց նախաձեռնությամբ ԱԺ-ն ընդունեց հայտարարության նախագիծը, որով Ադրբեջանին դատապարտում են գերիներին չվերադարձնելու համար, այդ զգայուն թեմայով անգամ Հանրայինը ոչ թե հեռարձակում է, այլ մի նախադասությամբ հաղորդավարը հայտնում է, որ ԱԺ-ն ընդունել է այսպիսի վերնագրով հայտարարություն:
Ի պատասխան՝ Հակոբյանը հայտարարեց. «Մենք մի կարծրատիպ ունենք, որ Հանրային հեռուստաընկերությունը շատ վատ է աշխատում: Եթե ձեր էլեկտրոնային փոստի հասցեն տաք, ես ձեզ կուղարկեմ համեմատականը հյուրերի անվանացանկի, թեմաների ու այդ կարծրատիպը կկոտրվի: Հանրային հեռուստաընկերությունն այսօր ամենաազատ, ամենաբազմազան հեռուստաընկերությունն է: Որեւէ այլ հեռուստաընկերություն՝ ընդդիմադիր լինի, թե անկախ, այդպիսի լայն սպեկտոր գործիչների, թեմաների չի տալիս: Խնդրեմ, նայեք Պետրոսի հյուրերին: Որ ինքը իդեալական չի՝ միանշանակ այդպես է, բայց մենք այլ հեռուստաընկերությունների թերությունները չնկատելով՝ ամբողջ մեր ուժը գցում ենք Հանրայինի վրա, որը իրականորեն փոփոխել է իր բովանդակությունը: Հանեք տասը տարվա ցանկը՝ ովքեր են այնտեղ եղել հյուրերը եւ այսօր»:
Կարդացեք նաև
Թովմասյանը պնդեց, որ Հանրայինը ակնհայտ կողմնակալ վերաբերմունք ունի անկախ պատգամավորների նկատմամբ. «Երբեմն, երբ ԱԺ-ում մոլորյալ լրագրողներ են լինում Հանրայինից, միամիտ մեզանից հարցազրույց են վերցնում ու դա եթեր չի գնում»: Նա վստահեցրեց, որ Հանրայինը բացառապես օրվա իշխանության շահն է պաշտպանում:
Ի պատասխան՝ Տիգրան Հակոբյանը հորդորեց բովանդակային խնդիրները քննարկել Հանրայինի խորհրդի անդամների հետ. «Ես չգիտեմ, ԱԺ-ում որեւէ անգամ հավաք եղե՞լ է, նստե՞լ եք, թեյ խմե՞լ եք խորհրդի անդամների հետ: Ոչ մի անգամ»:
Հռիփսիմե ՋԵԲԵՋՅԱՆ
Լուսանկարը՝ Հայաստանի Հանրային ռադիոյի
