Օրերս Եռաբլուր պանթեոնում տեղի ունեցավ ՀՀ ԿԳՄՍՆ Գեղարվեստական դաստիարակության եւ մշակույթի մանկապատանեկան կենտրոնի «Կան» եւ «Դեպի լույս» միացյալ երգչախմբի, որը գործում է Երեւանի Նիկողայոս Տիգրանյանի անվան տեսողության խանգարումներ ունեցող երեխաների թիվ 14 հատուկ դպրոցում, «Անմահ եք, մեր հերոսներ» խորագրով համերգը: Այն նվիրված էր մեր հերոսներին: Համերգի սկզբում կազմակերպվեց մոմավառություն, այնուհետեւ երեխաներն իրենց ձեռքով ծաղիկներ դրեցին հերոսների շիրիմներին:
«Մեզ համար այս համերգը շատ կարեւոր նշանակություն ուներ, մենք պետք է անպայման մեր երգերով մեր երախտագիտությունն ու շնորհակալությունը հայտնեինք մեզ համար իրենց կյանքը նվիրած հերոսներին: Համերգը վարում էի ես, գրել էի բանաստեղծություններ մեր հերոսներին նվիրված: Մի փոքր եղանակի արեւոտ լինելը խանգարեց, բայց ամեն ինչ շատ լավ անցավ: Ես միշտ հիացել եմ ու հիանում եմ իմ քաջ սաներով: Նրանք ոչ արեւից են վախենում, ոչ անձրեւից, ոչ ցրտից: Ես դրանում բազմաթիվ անգամներ եմ համոզվել, հատկապես երբ եղանք Արցախի զորամասերում եւ օրը 2-3 կենդանի համերգ էինք ունենում արեւոտ եղանակին: Նրանք աշխարհի ամենաառողջ բալիկներն են: Հունիսի 1-ին էլ պատրաստվում ենք նշել երգչախմբերի 5-ամյակը Արամ Խաչատրյան տուն-թանգարանի հյուրընկալ դահլիճում: Երկու տարի անընդմեջ մենք այստեղ անցկացնում ենք մեր համերգային ծրագիրը եւ շատ շնորհակալ ենք»,- նշեց երգչախմբի գեղարվեստական ղեկավար Վարդուհի Խաչատրյանը:
Վ. Խ.
«Առավոտ» օրաթերթ
25.05.2021
