Հին Նորքում գտնվող այս տանը, տանտիրոջ վկայությամբ, մեկ ամիս ապրել է Գարեգին Նժդեհը: Իսկ սա էլ այն մահճակալն է, որի վրա, ըստ տանտիրոջ, քնել է Գարեգին Նժդեհը: Ընդհանրապես, Հին Նորքում վերջին շրջանում աշխուժություն է նկատվում, բացվում են հյուրատներ, նորից իրենց մասին հիշեցնում են հնագույն գինու մառանները:
Զբոսաշրջային մասնագետների համոզմամբ, Հին Նորքը զբոսաշրջային չբացահայտված հնարավորություններ ունի` հարյուրամյա տներ, մաքուր օդ, լավ սնունդ, գեղեցիկ տեսարան վերեւից:
Ընդհանրապես Նորքը հայտնի է 19-րդ դարից սկիզբ առնող գինեգործական ավանդույթներով: Ասում են՝ Նորքում կար գինեգործական թաղամաս՝ 100 մառաններով, որոնցից պահպանվել է 3-ը, այժմ գործում է միայն Դերձակյանների մառանը, որը 150 տարվա ընթացքում միշտ աշխատել է:
Հին Նորքի խորհրդանիշն է նաեւ Չինարի ծառը, որն ուղեցույց է զբոսաշրջիկներին Նորք բերող տաքսու վարորդների համար:
Նորքեցիներին բնորոշ է եղել քեֆ-ուրախությունը, հյուրընկալությունը: Նրանց մառանները միշտ լիքն են եղել, ու ժամանակին Հովհաննես Շիրազը եւ այլ գրողներ հաճույքով են Նորքի անտառներում ժամանակ անցկացրել: Ի դեպ, հայտնի «Հեղնար աղբյուր» ֆիլմի որոշ դրվագներ հենց Հին Նորքում են նկարվել:
Կարդացեք նաև
Գոհար ՀԱԿՈԲՅԱՆ
«Առավոտ» օրաթերթ
25.05.2021
