Այսօր Aravot.am-ը ՀՀ տարածքային կառավարման և ենթակառուցվածքների նախարար Սուրեն Պապիկյանից հետաքրքրվեց՝ մի՞թե Տավուշում մենք ունենք ադրբեջանական հողեր, ինչպես որ հայտարարում է իմքայլական պատգամավոր Վահե Ղալումյանը:
Սուրեն Պապիկյանն ասաց․ «Հարգելի’ գործընկերներ, Խորհրդային Հայաստանի տարածքը և 1992 թվականին ՄԱԿ-ի կողմից ճանաչված մեր երկրի տարածքը 29,8000 քառակուսի կիլոմետր է։ Ելնելով տարածաշրջանի իրավիճակից՝ Ադրբեջանի հետ սահմանային լարվածությունից, այդ սահմանը տարբեր տեղերում ունի տարբեր պատկեր։ Վարչապետը նաև խոսել է, որ Խորհրդային Հայաստանի մաս կազմող դե յուրե Հայաստանի Հանրապետության մաս կազմող Արծվաշեն գյուղն այսօր գտնվում է Ադրբեջանի վերահսկողության տակ։ Եվ հիմա վերադառնալ նրան, թե հիմա ինչ տարածքներ, ինչ բարձունքներ, ինչ հովիտներ կան մեր վերահսկողության ներքո, մենք հիմա ճիշտ ճանապարհով չենք գնում։
Ես ուղղակի ձեր ուշադրությունն եմ հրավիրում այն հանգամանքին, ի սեր Աստծո հեռու ձեզանից, այն, ինչ առաջադրում է մամուլը, երկու օր հետո դա պահանջ է դառնում հարևան երկրի կողմից։
Ես խնդրում եմ սահմանային հարցերում, պետության անվտանգությանը վերաբերող հարցերի նկատմամբ լինենք մի փոքր փակ ու սահմանափակ»։
Կարդացեք նաև
Լրագրողներից մեկի դիտարկմանը, թե անվտանգության ապահովումը իշխանության խնդիրը չէ՞, նախարարը պատասխանեց․ «Այո, իշխանության խնդիր է, տեղեկատվության ապահովումը նաև տեղեկատվական անվտանգության։ Բայց ես չեմ ուզում ու նաև կարծում եմ, որ բոլորս չենք ուզում, որ դա տեղի ունենա մամուլի սահմանափակման միջոցով։ Համապատասխան մարմինները, կարծում եմ, զբաղվում են դրանով, ու ովքեր տալիս են ինֆորմացիայի արտահոսքերը, նրանց նկատմամբ ինչ-որ աշխատանքներ կատարվեն»։
Լրագրողներից մեկի ճշտող հարցին՝ ձեր ասածից ենթադրենք, որ մեր մամո՞ւլն է թշնամուն օրակարգ թելադրողը, նախարարը պատասխանեց․ «Ես չեմ ուզում նման մեղադրանք հնչեցնել, ես ասում եմ այն, ինչ տեղի է ունենում»։
Նունե ԱՐԵՎՇԱՏՅԱՆ
