Իրանագետ Էմմա Բեգիջանյանը վստահ է՝ պետք չէ Ադրբեջանին ճանապարհ տալ:
«Կոշտ արձագանք Իրանի կողմից չի լինելու»,- «Առավոտի» հետ զրույցում այսպիսի կարծիք հայտնեց իրանագետ, ՄԱՀՀԻ ասոցացված փորձագետ Էմմա Բեգիջանյանը:
Անդրադառնալով Սյունիքում այս օրերին կատարվող իրադարձություններին՝ նա ասաց. «Առաջին օրվանից եմ ասել՝ ՀՀ-ն անկախ զարգացումներից պետք է դիմեր ՄԱԿ-ի անվտանգության խորհուրդ. թեկուզ կմերժվեր, անկախ՝ հետագայում ինչ կլիներ, ադրբեջանցիները հետ կքաշվեին, թե՝ ոչ, պետք է դիմեր»:
Ըստ Էմմա Բեգիջանյանի՝ եթե հարցը հասներ ՄԱԿ-ի անվտանգության խորհուրդ, Իրանը Հայաստանի օգտին էր դիրքորոշում ունենալու:
Անդրադառնալով ներկայումս Իրանից սպասելիքներին՝ Էմմա Բեգիջանյանն ասաց. «Իրանը պարզապես հորդորելու, ասելու է, որ միջազգայնորեն ընդունված օրենքներն են ոտնահարվում: Իրանը կոշտ միջոցներ ձեռք չի առնելու, բայց դիվանագիտական բոլոր միջոցներն իրագործելու են»:
Կարդացեք նաև
Իրանագետը փաստեց՝ Իրանն այն պետությունն է, որը ոչ մի պետության վրա հարձակում չի գործել եւ դա չի անի առավել եւս՝ շիա Ադրբեջանի վրա. «Հայաստանի եւ Իրանի շահերը միշտ են համընկնում: Սակայն Իրանը չի հարձակվի Ադրբեջանի վրա»:
Անդրադառնալով Իրանի դեմ պատժամիջոցներին՝ Էմմա Բեգիջանյանը նշեց. «Իրանի դեմ շուտով սահմանափակումները կվերանան, քանի որ գուցե հաջորդ շաբաթ ստորագրվի համաձայնագիր: Դա ավելի հավանական է, քան այն, որ Իրանը կարող է Ադրբեջանի վրա հարձակվել կամ ռազմական գործողություններ անել: Մյուս կողմից՝ ՀՀ վարչապետի պաշտոնակատարը շարունակ ասում է՝ մենք չե՞նք ուզում գնացքով գնանք Իրան, իսկ մի՞թե Իրանն ասում է, որ ուզում է Նախիջեւանով գնացքով գալ Հայաստան: Իրենք դրան կողմ չեն: Հետեւաբար, եթե հաշվի առնենք, որ մեր արտահանումը Իրան, բացի էլեկտրաէներգիայից, շատ փոքր քանակ է կազմում, մեզ այդ գնացքը, Ադրբեջանի ճանպարհը պետք չէ: Իսկ եթե Իրանն ուզենա գնալ Ռուսաստան, արդեն Ադրբեջանն այդ հարցը լուծել է: Ադրբեջանով Ռուսաստան գնացքի ճանապարհն արդեն համարյա թե կա»:
Այն, որ Իրանը դեմ է, այսպես կոչված՝ «Զանգեզուրի միջանցքին», որով փաստացի փակվում է Թեհրանի համար դարպասը եւ մեր հարցին՝ այդ դեպքում ինչո՞ւ չենք տեսնում Իրանի կոշտ արձագանքը, Էմմա Բեգիջանյանը պատասխանց. «Իրանն ունի նաեւ այլ շահեր: Իրան-Ռուսաստան փոխհարաբերությունները փոխադարձ անվստահության մթնոլորտում են: Երբ ԱՄՆ-ն երկուսին էլ սահմանափակումների է ենթարկում, սրանց շահերն այստեղ համընկնում են՝ հարկադրված: Հենց ազատ լինեն սահմանափակումներից, նրանց շահերն այլեւս չեն համընկնի»:
Ի տարբերություն ՌԴ-ի հետ հարաբերությունների՝ ըստ Էմմա Բեգիջանյանի՝ Իրան-Հայաստան շահերը միշտ են համընկնում: Մեր հարցին՝ այս հանգամանքն օգտագործելու համար ի՞նչ պետք է աներ Հայաստանը, որը չի արել ու չի անում, Էմմա Բեգիջանյանը պատասխանեց. «Ավտոմայրուղին կառուցելն էր, որը եթե հիմա կառուցված լիներ, արդեն երկաթուղային միջանցքի տակ կմտներ դա: Բայց դա չենք արել ու հիմա էլ չենք անում: Հյուսիսային հատվածում արել, թողել ենք, հարավային հատվածում չենք արել: Պետք է հնարավորություն գտնել եւ դա անել: Պետք չէ Ադրբեջանին ճանապարհ տալ»:
Տաթև ՀԱՐՈՒԹՅՈՒՆՅԱՆ
«Առավոտ» օրաթերթ
22.05.2021
