«Պատերազմից հետո տեսնում եմ՝ ինչ-որ թվով մարդիկ պատրաստ են ներել այս իշխանությանը»,-«Լուսավոր Հայաստան» կուսակցության (ԼՀԿ) 3-րդ համագումարի ընթացքում իր ելույթում հայտարարեց ԼՀԿ նախագահ Էդմոն Մարուքյանը:
Այս առիթով նա ասաց. «Դու կարող ես ներել իշխանություններին, որոնք սխալ են արել, բայց հասկանում են իրենց սխալը: Բայց երբ սխալը շարունակվում է, դիցուք այս վերջին փաստաթուղթը, ի՞նչն ենք ուզում ներել, ո՞նց ներել, ո՞րը ներել: Ներել քվեարկելո՞վ, որ թույլ չտաս նրանք գան, դա չեղավ ընտրություն: Ընտրությունը նա է, որ դու եղածի միջից որոշում ես քվեարկել ինչ-որ մեկի՞ն: Բայց երբ դու ընտրում ես ընդդեմ ինչ-որ մեկի, որ նրանք չգան, դա ընտրություն չէ»:
Էդմոն Մարուքյանի համոզմամբ՝ դա նշանակում է՝ եթե այս ընտրությունն այդ ձևով լինի, այն լինելու է միջանկյալ մի բան. ՀՀ ներքաղաքական ճգնաժամը չի հաղթահարվի: Նա այդ ճգնաժամը հաղթահարելու այսպիսի ելք նշեց. «Այդ ճգնաժամը հաղթահարելու համար ես առաջարկել եմ բոլոր նախկին նախագահներին, որոնք ունեն մեծ ռեսուրսներ, բոլոր ուժերին առաջարկել եմ մի կողմ քաշվել և թույլ տալ, որ երկիրը շարժվի առաջ: Նրանց մասնակցությամբ իշխանությունը միս ու արյուն է ստանում նրանց հակառեյտինգի շնորհիվ: Պատկերացրեք՝ իշխանությունն ունի մի 10-15 տոկոս ձայն, 20 տոկոս գալիս, գումարվում է ընդդեմ նրանց, ո՞նց անենք, որ այդ ընդդեմ ձայնը չլինի: Եթե դուք մասնակցում եք, վերարտադրում եք Նիկոլին: Կաք դուք, կա Նիկոլը»:
Դիմելով այն ուժերին, որոնք ասում են՝ գալիս ենք, Էդմոն Մարուքյանն ասաց. «Ո՞ւր եք գալիս, մենք գալիս ենք, հավաքվել, գալիս ենք, ես ասում եմ՝ բա՞ն է մնացել, որ գաք: Որ նայում եմ՝ ինչ դաշինքներ ենք կազմվում, ովքեր են իրար հետ դաշինք կազմում, ուղղակի ապշած եմ. անուններ չտամ, հասկանալի է՝ ինչի մասին է խոսքը: Բարոյականության ճգնաժամ կա երկրում: Ժողովրդին ասում են՝ դուք այլընտրանք չունեք, բայց մենք ասում ենք՝ կա այլընտրանք, քվեարկիր»:
Կարդացեք նաև
Էդմոն Մարուքյանը հորդորեց քաղաքական որոշ ուժերի «օդերից իջնել» ու ասաց. «15-16 ուժ հայտ է ներկայացրել մասնակցության, բոլորի հետ էլ կան շփումներ: Բոլոր ուժերն ասում են՝ դե, մենք ունենք 25 տոկոս ձայն, կան մի քիչ ավելի այսպես ասած՝ «պրիզիմլյոննի» ուժեր, որ ասում են՝ մերը 17 տոկոս է: Ձե՞ռ եք առնում. այդ ոճով, որ գնում եք, ուզում եք երկրում բա՞ն փոխել: Դուք փոշիացնում եք մեր ժողովրդի ձայները: Դրանք գումարվելու են 1-4-րդ տեղերում գտնվող ուժերին: Իջեք օդերից, ձեր տոկոսներից, եթե նման կերպ հաշվենք, երևի 400 տոկոս ձայն կա: Մենք ասում ենք՝մեր հարթակը բաց է՝ եկեք, միացեք, կարողանանք բան փոխենք: ԼՀԿ դռները բաց են: Մեզ այսօր պետք է համերաշխություն: Մենք չենք ուզում, որ շարունակվի այս գզվռտոցը, լինի համերաշխություն, մերժենք՝ ատելությունը մեր երկրի ներսում: Առանց համերաշխության մեր բանակը, տնտեսությունը չեն կարողանալու վերականգնվել, ուժեղ բանակցող չենք ունենալու: ԼՀԿ-ն այդ համերաշխության շարժումն է»:
Տաթև ՀԱՐՈՒԹՅՈՒՆՅԱՆ
